Nuummi Ilulissanilu mittarfissat Kalaallit Airportsip suliariumannittussarsiuullugit aallartikkai
Kalaallit Airportsip Nuummi Ilulissanilu mittarfissat sanaartornissaannut taamaalilluni suliariumannittussarsiuussisinnaanngorpoq, Kalaallit Airportsimi pisortaq Peter Wistoft taama ilisimatitsivoq.
Qaqortumi mittarfissap sanaartorneqarnissaata suliariumannittussarsiuunneqarnissaa pilersaarusiorneq naammasseriarpat oqartussaniillu akuersissutit pisariaqartinneqartut pissarsiarineqariarpata aallartinneqassaaq.
Danmarkip Nunatsinni mittarfinnut aningaasaliinera
* Naalagaaffik Nuummi Ilulissanilu mittarfinnut 700 mio. koruuninik aningaasaliivoq. Naalagaaffiup taamaalilluni mittarfiit marluk 33,3 procentimik piginneqataaffigisinnaalerpai
* Den Nordiske Investeringsbankimit 450 mio. koruuninik atorniartoqarpoq, naalagaaffillu atornermut qularnaveeqqusiisuuvoq, taamaalilluni atukkanit erniat appasissinnaallutik.
* Naalagaaffik aningaasaliissutinik pisariaqartitat sinnerinut 450 millionit koruuninik erniakitsumik taarsigassarsisitsissaaq.
* Naalakkersuisut Naalagaaffillu 220 mio. koruuninik sanitigut aningaasaliipput, taakku Nunatsinni inuussutissarsiornerup ineriartortinneranut atorneqassapput.
- Matumani atsioqatigiinneq pingaaruteqartupilussuuvoq, Peter Wistoft oqarpoq.
- Ukiuni kingullerni marlunni angusassamik toraagaqarluni sulinerup inernera minnerunngitsumillu sanaartornerup aallartinneqarnissaa nuannaarutigaarput.
Pilersaarutillu eqquutsinneqarsinnaassappata Nuummi, Ilulissani Qaqortumilu mittarfiit nutaat 2023-mi oktobarip qaammataani atorneqarsinnaanngussapput.
Piumasaqaatit danskit naalagaaffiannut isumaqatigiissutigineqartut tamaasa piareerput, Danmarkillu aningaasaleeqataaneratigut mittarfiit sanaartorneqarnissaat 1 milliard koruuninik akikinnerussapput, pisortaq oqarpoq.
AAMMA ATUARUK Danmarkip mittarfiliassanut aningaasaleeqataanissaa inaarutaasumik atsioqatigiissutigineqartoq
- Taaarsigassarsinermi erniatigut atugassarititaasut pitsaasut anguagut, taakkulu nammineerluta angusinnaanavianngikkaluarpagut. Danskit naalagaaffiata suliniummut peqataaneratigut ataatsimut 1 milliard koruuninik sipaaruteqassaagut, Peter Wistoft oqarpoq.
Suliariumannittussarsiuussineq upernaaq manna pissaaq, suliarinnikkumallutillu soqutiginnittut kingusinnerpaamik ukioq manna maajip 15-iani neqeroorutiminnik tunniussereersimassapput. Suliarinnittussatut toqqarneqartup aasap ingerlanerani saqqummiunneqarnissaa Kalaallit Airportsip naatsorsuutigaa.
Pilersaarutillu malillugit qaartiternerit siulliit septembarimi aallartinneqassapput.
AAMMA ATUARUK Løkkep danskit mittarfinnut aningaasaliissutaat illersorpaa
Suliariumannittussarsiuussinermut piffissaliussaq naapertorlugu mittarfiit marluusut ataatsikkut sanaartorneqassapput, suliariumannittussarsiuussinermili atortussat periarfissaqartitsipput suliarinnittussat allanik neqerooruteqarnissaannut, sanaartornerit tamakkiisumik imaluunniit piffissami allami ilaannakortumik ingerlanneqarsinnaallutik.
Nuummi mittarfissap avatangiisinut sunniutissaanik nalilernerata akuerineqarnera Naalakkersuisunit marsip aallaqqaataani nalunaarutigineqarpoq.
Ilulissani mittarfissap avatangiisinut sunniutissaanik nalilernera aamma akuerineqareerpoq, Qaqortumili mittarfiliornissamik suliniut mikinerummat avatangiisinut sunniutissaanik nalilernera akuereqqaarneqartussaanani.
