Nuummi kisitseqqittoqarnera qinersinerup inerneranik kinguarsaavoq
Partiit siuttui utaqqikatappasillutik KNR-ip torsuusaani nikorfapput, partiit siuttuisa naggataarutaasumik apeqqarissaarfigineqarnissaat utaqqiinnarpaat. Nunatsinnimi illoqarfiit annersaanni inernerit saqqummiunneqartinnagit nuannaarnissamut qianissamulluunniit pissutissaqassanerlutik naluaat, taamaakkaluartoq nunatta siuttua quianartumik oqaluttuassaqarpoq.
-Eqqaariaasaarpara ukiorpassuit matuma siorna qinersisoqarnera. Aamma taamani sivitsortoorutigaarput, inerneratalu saqqummiunneqannginerani siniliinnartoorpugut. Aqaguani ullaakkut iterama, eqqaalerpara ippassaammat qinersilluta uangalu qinigaasimanerlunga nalullugu. Qujanartumilli qinigaasimavunga, Kuupik Kleist qungujulaaarluni oqarpoq, siulittaasoqataalu utaqqiinnarput, inernerit inaarutaasut piareerpata oqaaseqarnissaminnut piareersimallutik.