Nuummi inuusuttut: 16-inik 17-inillu ukiullit tallimanngorpat akiuussuserneqarsinnaalersut

Inuusuttut 16-17-inik ukiullit Pfizerimik tallimanngorpat akiuussuserneqarsinnaapput.

Tamanna nal. 14.00-miit 17.00-mut USK-imi pissaaq.

Facebookimi Kommuneqarfik Sermersooq allappoq.

- Caféerniaraanni, timigissariarniaraanni, filmeriarniaraanni assigisaanillu sammisaqarniaraanni kapitissimanissaq piumasaqaatinngoriaannaavoq. Kapitissimaguit ikinngutitit, ilaquttatit inuillu allat ilinnut qanittumik inissisimasut coronamut illersussavatit, kommuni taama allappoq.

AAMMA ATUARUK Nuna tamakkerlugu angalassagaanni akiuussuserneqarsimasariaqartoq

Nunatsinni kapitissimanermut uppernarsaat atuutilissaaq. Sulili atuutilinngilaq. Tamanna atuutilerpat akiuussuserneqarsimanngikkuit imerniartarfinnut, neriniartarfinnut timersortarfinnullu iseqqusaanngilatit.

Naammassilluni akiuussuserneqarsimanermut uppernarsaat digitalikkut pappilissatigulluunniit atuutilissanersoq Naalakkersuisut misissuleruttorpaat.

Killilersuutit unioqqutissimagaanni akiliisitaasoqarsinnaasoq, Naalakkersuisut oqarput.

Nunani allani meeqqanik inuusuttunillu akiuussutissalersuilereertut, aqqaneq marlunniit 17-inut ukiulinnik akiuussutissalersuinissamut nunatsinni oqartussat tunuarsimaarsimapput. 

Inuusuttulli 16-inik 17-inillu ukiullit Pfizer-BioNTech-ikkimeersumik akiuussuserneqarnissamut neqeroorfigineqassasut, Naalakkersuisut maanna aalajangerput.

Meeqqanik akiuussusersuinissamut piareeqqanngitsut 

Meeqqat aqqaneq malunniit 15-it tikillugit ukiulinnik akiussutisalersuinermik pilersaarummut ilanngunnissaat suli siusippallaartoq, Naalakkesuisut isumaqarput. Meeqqanik akiuussutisalersueratarsinnaaneq eqqarsaatigilertinnagu, nunani allani misilittakkat aallaavigalugit Naalakkersuisut nalilersoqqaarusuppaat.   

AAMMA ATUARUK 16-inik 17-inillu ukiullit akiuussuserneqarsinnaangajalersut

- Qanittumi nunani allani aamma Danmarkimi, (...) meeqqat 12-15 ukiullit akiuussutissalerneqarnerat aallartippoq. Maannamut nunatsinni (...) nunani allani taamatut ukiullit akiuussusersorneqarnerisa ineriartornerat aamma kinguneri ataavartumik malinnaavigineqassapput, Kirsten Fencker allappoq.

16-it ataallugit ukiullit peqqinnissakkut illersorneqarsinnaasoq nakorsaaneq naliliippat, akiuussutissalerneqassanersut Naalakkersuisunit aalajangerneqarumaarpoq.