16-inik 17-inillu ukiullit akiuussuserneqarsinnaangajalersut
Nunani allani meeqqanik inuusuttunillu akiuussutissalersuilereertut, nunatsinni oqartussat aqqaneq marlunniit 17-inut ukiulinnik akiuussutissalersuinissamut tunuarsimaarsimapput.
Inuusuttulli 16-inik 17-inillu ukiullit Pfizer-BioNTech-ikkimeersumik akiuussuserneqarnissamut neqeroorfigineqassasut, Naalakkersuisut maanna aalajangerput.
Peqqissutsimut naalakkersuisoq, Kirsten Fencker (N), Inatsisartunut ilaasortamut Sofia Geislerimut (IA) akissuteqarluni taama allappoq.
- Nunatta Nakorsaaneqarfianiit innersuussereernerup kingorna aalajangerneqarpoq, immikkut ittumik pilersaarusiortoqassasoq, taamaasilluni eqimattakkuutaat annerumaat 16-17 ukiullit akiuussutissamik Pfizer-BioNTech-imeersumit neqeroorfigineqarsinnaaniassammata, taanna allappoq.
16-inik 17-inillu ukiullit akiuussusersorneqarnerat qaammami matumani aallartinneqariisssasoq anguniagaasoq, taanna naalakkersuisoq allappoq.
Meeqqanik akiuussusersuinissamut piareeqqanngitsut
Meeqqat aqqaneq malunniit 15-it tikillugit ukiulinnik akiussutisalersuinermik pilersaarummut ilanngunnissaat suli siusippallaartoq, Naalakkesuisut isumaqarput. Meeqqanik akiuussutisalersueratarsinnaaneq eqqarsaatigilertinnagu, nunani allani misilittakkat Naalakkersuisut nalilersoqqaarusuppaat.
- Qanittumi nunani allani aamma Danmarkimi, (...) meeqqat 12-15 ukiullit akiuussutissalerneqarnerat aallartippoq. Maannamut nunatsinni (...) nunani allani taamatut ukiullit akiuussusersorneqarnerisa ineriartornerat aamma kinguneri ataavartumik malinnaavigineqassapput, Kirsten Fencker allappoq.
Nakorsaaneq naliliippat peqqinnissakkut illersorneqarsinnaasoq, 16-it ataallugit ukiullit akiuussutissalerneqassanersut Naalakkersuisunit aalajangerneqarumaarpoq.