Nuummi inuit qulit coronavirusimik tunillatsissimasutut paasineqartut

Nuummi ulloq unnuarlu kingullermi paasineqartut quliummata, tunillatsissimasut amerliartorput. Nunatsinni covid-19-imik tunillatseqqasut maanna 102-jupput.

Tamanna Nunatta Nakorsaaneqarfiata kisitsisaataasa nutaat takutippaat.

- Tunillatsissimasutut paasineqartut arlallit sapaatit akunnerisa siuliata naanerani illoqarfimmiipput, tassanilu tunillatsissimanissaat ilimagineqartariaqarpoq. Taakkua saniatigut ikittut paaqqinnittarfinni atuarfinnilu tunillaassuunnermit ilisimaneqartunit tunillatsissimanissaat ilimagineqartariaqarpoq, oqartussat allapput.

AAMMA ATUARUK Corona pillugu ullumikkut kisitsisit: Tunillatsittut nutaat 13-it

Tunillatsissimasutut paasineqartut pingasut tunillaassuuffiusuniissimannginnamik qanoq tunillatsissimanersut ilisimaneqanngilaq.

Nuummi inuit 650-it Sisimiunilu inuit 280-it ulloq unnuarlu kingullermi misissortissimapput.

Innuttaasut 63 procentii tamakkiisumik akiuussuserneqarsimasut

Aamma tunillatseqqasoq ataaseq unitsinneqarsimasoq oqartussat paasissutissiissutigaat. Coronavirusili unitsinneqarneranut pingaarnertut pissutaanngitsoq, oqartussat erseqqissaassutigaat.

Innuttaasut 63,4 procentii tamakkiisumik akiuussuserneqarsimasut, 72,3 procentiilu siullermik kapitissimasut kisitsisit takutippaat.