Nuummi misissuisarfimmut siuleriaattut.Assi: Malik Brøns / KNR

Corona pillugu ullumikkut kisitsisit: Tunillatsittut nutaat 13-it

Tunillatsittut nutaat 11-t Nuummi paasineqarput.

Tunillatsittut nutaat 13-it ullup ataatsip kingulliup ingerlanerani paasineqarput.

Taakkunannga aqqanillit Nuummiipput, marlullu Sisimiuniillutik. Sisimiuni paasineqartut marluk Nuummiit Sisimiunut angalasimapput.

Nakorsaaneqarfik taama paasissutissiivoq.

Nunatsinni tunillatsissimasut katillugit ullumikkut 100-qqissaapput. Nunatsinni covid-19-imik tunillatsissimasut aggustip qiteqqunnerani amerlanerpaagamik 103-upput.

Sisimiuni tunillatsissimasut nutaat Nuummiit "qanittumi tikittuupput, taakkulu tuniluuttoqarnera aallarteqqinneranut pissutaasinnaalluarput", Nakorsaaneqarfik paasissutissiivoq.

Illoqarfinni allani tunillatsittut amerliartoratarsinnaasut

Tunillatsissimasut ullup kingulliup ingerlanerani paasineqartut ataaseq minillugu inersimasuupput. Ilaat Nuummi ulluunerani paaqqutariffinnut tuniluuttoqarfiusunut atassuteqarput, tunillatsissimasulli nutaat amerlanerpaartaat sapaatip akunnera naanerani imerniartarfissiorsimasuullutik.

Tunillatsissimasulli arlalqartut sumi tunillatsissimasinnaanerlutik ilisimanngilaat. Sapaatip akunnerata siuliani inunnut tunillatsissimasutut paasineqartunut atassuteqarsimasut tunillaalersimagunarput.

Taamaalillunilu Nuummi inuiaqatigiinni tunillaassuuttoqarluni - tassa imaappoq inuit Nuummi illoqarfimmukartut tunillatsinnissaat aallerinartunngortoq.

AAMMA ATUARUK Tamaat isigalugu: Coronavirus pillugu killiffik

Illoqarfinni allani tunillatsissimasut amerlassusaat amerliartulissagunik nalinginnaasuussasoq, Nakorsaaneqarfik naliliivoq. Inuimmi Nuummiit angalasut coronamik tunillatsissimasinnaapput - aamma naak akiuussutissamik marloriarlutik kapitereersimagaluarunik.

- Nunatsinni sumiiffinni tamani COVID-19-imut ersiutit eqqumaffigilluarneqassapput, pingaartumik inuit Nuummiissimasut imaluunniit Nuummiissimasunut attaveqarsimasut akornanni, Nakorsaaneqarfik tusagassiuutinut nalunaarummi allappoq.

Sisimiunili tunillaassuuttoqarnera unikaallakkiartorpoq.

Tunillatsissimasut ullumikkut amerlassusaat kommunikkaarlugit:

  • Avannaata Kommunia: 1
  • Kommune Qeqertalik: 0
  • Qeqqata Kommunia (Sisimiut): 11
  • Kommuneqarfik Sermersooq (Nuuk): 88
  • Kommune Kujalleq: 0

Corona pissutigalugu malittarisassat sukannersut Nuummut ippassaq atulersinneqarput. Sisimiuni malittarisassanik qasukkaasoqarpoq, nunatsinni illoqarfiit annersaata tulliani qanermut assiaquteqaqqusineq inuillu amerlanerpaamik 20-nnaat katersuussinnaatitaanerat atorunnaarsinneqarpoq.

Tassa imaappoq aatsaat tamakkiisumik akiuussuserneqarsimaguit neriniartarfiliarsinnaavutit, imerniartarfiliarsinnaavutit timigissartarfiliarsinnaallutillu.

Nuummi Sisimiunilu sumiiffiit uku tamakkiisumik akiuussuserneqarsimallutit imaluunniit coronamik tunillatsissimannginnermut uppernarsaammik sivisunerpaamik akunnernik 48-nik pisoqaassuseqartumik peqaruit aatsaat iserfigisinnaavatit:

  • Neriniartarfiit, kaffisorniartarfiit, imerniartarfiit, diskotekit assigisaallu, kiisalu silami nunaminertat taakkununnga atasut.
  • Kulturikkut sullissiviit: kulturikkut illorsuit, filmertarfiit, katersugaasiviit, inersuit saqqummersitsiviit assigisaallu.
  • Innuttaasut illui assigisaallu.
  • Atuakkanik atorniartarfiit.
  • Illup iluani silamilu timersortarfiit, soorlu init timersortarfiit, inersuit timersortarfiit, naluttarfiit, timigissartarfiit aamma isikkamik arsartarfiit.
  • Nujalerisut, tagiartuisartut, pinnersaasarfiit assigisaallu.

Akiuussutissamik kapitisimanngikkuit tunillatsissimannginnermullu uppernarsaateqarnak ukununnga suli isersinnaatitaavutit:

  • Pisiniarfiit
  • Allakkeriviit
  • Mittarfiit
  • Pisortani oqartussaasut sulliviillu pilersuiviit kiffartuussinermi saaffiginnittarfii.
  • Assartuutit tamanit atorneqarsinnaasut utaqqisarfii.
  • Init suliannik ingerlatsivigisassatit.

Nunatsinni coronavirusi pillugu
killiffik

Tunillatseqqasut 36  
Ullumi tunillatsittut 9  
Siullermik kapitissimasut 71%  
Aappassaa kapitissimasut 65%  
Tunillanneqarsimasut 654  
Uninngasut 0  
Anersaartuuteqartitaasut 0  
Toqquteqartut 0  
corona.nun.gl-imi kisitsit takukkit  
   Nutarterneqarpoq: 
Oktobarip 15-iat 11:30
 

Coronavirusimik tunillatsinissaq pinaveersaaruk