Nuup ernga: Naalakkersuisoqarfiup kukkuneraanera misissuisarfiup ilumuunnginneraraa
- Akoorutissamik 1,2,4-triazolimik Nuup ernganik najoqqagassamik misissuinermi nassaarnerup naalakkersuisoqarfimmut februaarimi nalunaarutigineqariasaarnera misissuisarfimmi kukkunermik peqquteqarunarpoq.
Akoorutissamik 1,2,4-triazolimik Nuup ernganik najoqqagassamik misissuinermi nassaarneq nalunaarutigineqatsiareersorlu Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmi pisortaaneq, Mette Skarregaard Pedersen, tusagassiutinut apriilip tallimaanni ersarissumik taama nalunaarpoq.
AAMMA ATUARUK Nuummi imermi imerneqartussami tissalukaarut eqqumiitsoq nassaarineqartoq
Naalakkersuisoqarfiulli kukkuneraanera tunngavissaqanngitsoq, arlalitsigut erserpoq.
Naalakkersuisoqarfiullumi kukkuneraanera misissuisarfiup aamma ilumuunnginnerarpaa:
- Isumaqataanngilluinnarpunga. Imeq misissugassatut uagutsinnut tunniussaq 1,2,4-triazolimik akoqartoq misissuinitta takutippaa, misissuisarfimmi Højvang Laboratorierimi pisortaq Paw Nielsen oqarpoq.
Taamaammat Nuup erngata akoorutissamik oquiaammik 1,2,4-triazolimik ukioq manna sooq nassaarfigineqarnersoq suli nalunarpoq.
Misissuisarfimmeersimanissaa ilimananngitsoq
Misissuisarfik alla, Eurofins, Højvang Laboratorieritulli erngup najoqqagassap qanoq issusianik misissuinermik ilisimasaqarluarpoq, avatangiisinut naalakkersuisoqarfiullu nunatsinni imermik najoqqagassamik misissuisitsittarpaa.
Eurofinsimeersut Højvang Laboratorierip suliaa oqaaseqarfigerusunngilaat. Erngulli najoqqagassap qanoq issusianik misissuisarfinni isumannaallisaariaatsit misissukkat inernerisa eqqortuunissaannik qulakkeerutaasartut pillugit oqaaseqarusupput:
- Misissukkat 1,2,4-triazolimik akunikuusavut akoorutissamik taassuminnga nassaarfigisarpavut. Misissueriaatsivut eqqortuunissaat qulakkeerniarlugit taamaaliortarpugut. Taamaammat imeq najoqqagassaq misissugarput 1,2,4-triazolimik akoqarsimatillugu, taanna Eurofinsip misissuisarfianeersimasinnaasarnera ilimagisanngilarput, Eurofinsimi misissueriaatsinik inerisaanermut pisortaq Ole Silkjær allappoq.
AAMMA ATUARUK Nuummi imeq: Tissalukaarummik nassaartoqarnera misissusarfimmi kukkunermik pissuteqarsinnaasoq
Højvang Laboratorierimi pisortaq Paw Nielsen aamma taama isumalimmik oqarpoq:
- Piffissami kingullermi misissukkavut tamarmik pisarnermissut inerneqarput. Nuulli erngata misissukkap 1,2,4-triazolimik akoqangaatsiarnera immikkut ittutuaavoq, Paw Nielsen oqarpoq.
Nuup erngata akoorutissamik 1,2,4-triazolimik nassaarfigineqarnera misissugassat Nuummiit Danmarkimi misissuisarfimmut tikiunneqartut 1,2,4-triazolimik akoqareernerannik peqquteqartoq, Paw Nielsen oqarpoq.
Avatangiisinut naalakkersuisoqarfiup Højvang Laboratorier upernaaq kukkunerarpaa. Misissuisarfilli taanna tamatuminnga maanna ilumuunnginneraavoq. Tamannali naalakkersuisoqarfiup KNR-imit attaveqarfigineqarami oqaaseqarfigiumanngilaa.
Nuulli ernga 1,2,4-triazolimik akoqartoq paasineqarnerata kingorna Nuummi imeqarfinnit misissukkat allat 1,2,4-triazolimik akoqarnerannik ersertoqanngitsoq, naalakkersuisoqarfik allappoq:
- Nuup ernga 1,2,4-triazolimik akoqartoq Højvangip paasereeraalu Højvang Eurofinsilu Nuummi imeqarfinnit marlunnit imermik misissueqqeqquneqarput. Misissugaallu 1,2,4-triazolimik akoqanngitsut, missuinerisa takutippaat.
Taamaammat misissuisarfimmi Højvang Laboratorierimi kukkusoqarsimanera suli ilimanartoq, avatangiisinut naalakkersuisoqarfik isumaqarpoq.
Nassuiaataasinnaasut arlaqartut
Nassuiaataasinnaasulli arlaqarnerat miserratissaanngitsoq, naalakkersuisoqarfik e-mailikkut aamma allappoq.
Imeqarfiit 1,2,4-triazolimik akoqalernerannut issup nammineerluni tamatuminnga pilersitsisimanissaa tamatumalu tatsinut kuugaarussaasimanissaa pasitsaanneqarpoq. Taamali ilimasunneq GEUS-imi sulisup Anders R. Johnsenip ilalinngilaa:
- Kalaallit Nunaanni issoq 1,2,4-triazolimik nammineq pilersitsisinnaanngissoraara. Kalaallit Nunaanni issumi tappiorannartut uummaarippianngimmata tamaani issup 1,2,4-triazolimik nammineq pilersitsisimanissaa ilimanaatikippoq, taanna KNR-imut allappoq.
Air Greenlandip sermiiaammik imerpalasumik timmisartunut atuisarnera nassuiaataasinnaasut tulleraat. Sermiiaat taanna triazolimik akoqarnersoq paasiniarlugu, KNR-ip Air Greenland attaveqarfigaa akissutisinanili.
Timmisartunut sermiiaatit triazolimik akoqarnerannik tusagarnikuunani, avatangiisit pillugit siunnersorti oqarpoq. Taassuma 1,2,4-triazol pillugu immikkut ilisimasaliusup kiunini isertuukkusuppaa.
Tamanna qulaajarniaraanni issumik Nuummi mittarfiup eqqaaneersumik misissuisoqassasoq, taassuma kaammattuutigaa. Air Greenlandimmi timmisartunut sermiiaatigisartagaa triazolimik akoqarpat, Nuummi mittarfiup eqqaani issoq triazolimik qularnanngitsumik akoqassasoq, taanna isumaqarpoq.
Nuummi Qinngorpup mittarfissualiorfiullu ungasinngisaanni imeqarfiup Qallussuup ernganik najoqqagassamik misissuinermi 1,2,4-triazolimik aamma nassaartoqarpoq.
Assiliisoq: Malik Brøns.
Akoorutissap taassuma illut qalipaataanneersimasinnaanera, nassuiaataasinnaasut pingajoraat.
Nuummimi qisummik illuliat ilarpassui oquiaatinik akoqarsinnaasunik qalipataapput. Illut qalipaataat sialummit nungullariartoraangata akui imeqarfinnut kuugaarussaalersarsinnaasunik 1,2,4-triaxolinnguussinnaasarput:
- Kalaallit Nunaanni 1,2,4-triazolip illut qalipaataasa nungullarneranneersuunissaa ilimanartupilussuuvoq. Ilamerngalu uuliamut saffiukkanullu manngertorninaveersaammeersuusimasinnaavoq, manngertorninaveersaatilli triazolinik allanik akoqakkajupput, Anders R. Johnsen GEUS-imi sulisoq oqarpoq.
Avatangiisit pillugit siunnersorti aamma taama naliliivoq:
- Qisunnulli aanaveersaatineersuusimanissaa illullu qalipaataaneersuusimanissaa soorlu sialummit kuugaarussaalersarsimanissaa qisunnilluunniit silisaneersuusimanissaa ilimanartorujussuusoq isumaqarpunga, taanna oqarpoq.
Kikkut upperisassaappat?
1,2,4-triazolip nassaarineqartup suminngaanneerneranik nutaanik paasissutissaqanngitsoq, avatangiisinut naalakkersuisoqarfik ilisimatitsivoq.
Taamaammat Højvang Laboratorierip misissuisarfimmi kukkuneraasoqarneranik ilumuunnginneraanera assortorneqarsinnaanngilaq.
Højvang Laboratorierimmi tutsuiginarluinnartuunissaa, pisortap Paw Nielsenip pingaarteqaa. Taamaammat kukkusoqarsimagaangat misissuisarfiup tamatigorluinnaq isertuukkusuttanngilaa, isertuussinermi ajornerusumik kinguneqarsinnaasarmat:
- Højvangimi misissuinivut tutsuiginartuunissaat pingaarteqaarput. Tutsuiginartuunissarpullu misissuinitsinni kukkuluttornaveersaarnikkut kukkusimappallu nassuernikkut angusarparput.
Nuup ernganik najoqqagassamik misissuinermut tunngatillugu misissuisarfiup nalunaarsugai Danmarkimi oqartussanit akuersissuteqartartunit qaqugukkulluunniit pissarsiarineqarsinnaasut, taassuma eqqaasitsissutigaa.
- Nalunaarsukkatsinnut tunngatillugu isertuussassaqanngilagut, taanna oqarpoq.
Avatangiisinut naalakkersuisoqarfiup tutsuiginartuunissi aamma pingaartippaa.
Taamaammat Højvangip kukkusimaneranik takussutissaqanngikkaluartoq nassuiaataasinnaasullu arlaqartut assortoruminaakkaluartut naalakkersuisoqarfik sooq kukkuneraasimanersoq paasiniarlugu, KNR-ip naalakkersuisoqarfimmeersut apersorusussimagaluarpai.
Avatangiisinulli naalakkersuisoqarfimmeersut apersorneqarusunngillat.
Taamaammat suliamut tassunga tunngatillugu oqaatigineqartut suli assortuullutillu nalunarput.
