Nuummi imeq: Tissalukaarummik nassaartoqarnera misissusarfimmi kukkunermik pissuteqarsinnaasoq
Nuummi Tatsimi Imeqarfimmi Qallussuarmilu imermi imerneqartussami akoorutissap triazolip sinneranik ukioq manna februaarip naalernerani nassaartoqarpoq. Akoorutissaq taanna imermut qanoq isilluni pisimanersoq paasissaanngitsoq taamanikkut oqaatigineqarpoq.
Triazol tissalukaarutaavoq nalinginnaasumik nunalerinermi inerititanut oqunnut akiuutissatut atortoq, kisianni aamma qalipaatiniissinnaalluni imerpalasunilu naqitsissutini.
AAMMA ATUARUK Nuummi imermi imerneqartussami tissalukaarut eqqumiitsoq nassaarineqartoq
Taamaammat akuutissap imermi nassaarineqarnera paasiuminaappoq.
- Tassani nassaarineqarnera uissuuminalaartuuvoq, tassami akuutissaq taanna sumiiffinni oqunnut tissaluttaaviusuni atorneqartarmat. Maanimi taamaliortoqarneq ajorpoq, nakorsaaneq Henrik L. Hansen februaarimi oqarpoq.
Maannali suliamut atatillugu pingaarutilinnik paasisaqartoqarpoq, tatsinilu erngup pitsaassusaata pasitsaanneqarunnaarluni. Imermimmi misissuinerup takutippaa Nuummi imeq triazolimik akoqarunnaarsimasoq.
Misissuisarfimmeernissaa pasitsaatigineqartoq
Danmarkimi misissuisarfinni marlunni misissorneqaqqissaarneqartussanik imermit misissugassanik tigusisoqarsimasoq, nunalerinermut, imminut pilersornermut, nukissiuutinut avatangiisinullu naalakkersuisoqarfik tusagassiuutinut nalunaarummi allappoq.
Nuummi imeq imerneqarsinnaasoq ajoquteqanngitsoq misissuisarfinnit marlunnit misissukkat takutippaat.
Misissuisarfik maanna pasitsaanneqartoq:
- Nuummi imermit misissugassani 1,2,4-Triazol-inik nassaartoqartoq Naalakkersuisoqarfiup februaarimi nalunaarfigineqariataarnerani, laboratoriami kukkusoqarsimasoq ilimanarpoq, naalakkersuisoqarfik tusagassiuutinut nalunaarummi allappoq.
Taamaassimassappat taava imermi imerneqartussami Triazoleqarsimanngisaannarsimassaaq.
Taamaammat serpartaatit qanoq ilillutik imermik misissugassaniilerpat?
Imermi imerneqarsinnaasumi akoqarnissaa nakkutigineqartoq
Imeq misissugassaq imermik misissuisarfimmi pisarneq malillugu misissuisoqarneranut atatillugu mingutsinneqarsimasinnaanerat periarfissaavoq.
Aamma misissugassanut puut glassit triazolimik akoqarsimasinnaanerat imaluunniit inuk misissugassamik tigusisoq assaminik triazoleqarsimasinnaanera taamaalillunilu imermut nuutsinneqarsimasinnaanera periarfissaavoq.
Akuutissat qanoq ilillutik imermik misissugassaniilersimasinnaanerat suli nalunarallarpoq.
Nuummi imermit misissugassanik amerlanernik piffissami aggersumi tigusisoqarumaarpoq.