Nuummi imermi imerneqartussami tissalukaarut eqqumiitsoq nassaarineqartoq
Nuummi Tatsimi Imeqarfimmi Qallussuarmilu imermi imerneqartussami akuutissap triazol-ip sinneranik nassaartoqarpoq.
Taanna tissalukaarutaavoq nalinginnaasumik nunalerinermi inerititanut oqunnut akiuutissatut atortoq, kisianni aamma qalipaatiniissinnaalluni imerpalasunilu naqitsissutini.
Nunatta nakorsaanera Henrik L. Hansen naapertorlugu paasissaanngilaq akuutissaq taana qanoq ililluni imermut pisimanersoq.
- Tassani nassaarineqarnera uissuuminalaartuuvoq, tassami akuutissaq taanna sumiiffinni oqunnut tissaluttaaviusuni atorneqartarmat. Maanimi taamaliortoqarneq ajorpoq.
Nuumiut imermik imernissartik ernumagissavaat?
- Naamik, ernumasariaqanngillat. Imeq imerneqartussaq minguitsuussaaq. Kisianni akuutissap uuma imermiittup annikinnera minnerpaamillunniit toqunartuunngilaq, Henrik L. Hansen KNR-imut oqarpoq.
Naalakkersuisoq aarleqquteqarpoq
Tatsinit imeqarfinni taakkunannga marlunnit ulloq 23. februaari 2022 imermik misissuinerit takutippaat imermi imerneqartussami triazol-imik akoqarneq liiterimut 0,22 aamma 0,71 mikrogramip akornanniittoq.
Taamaalilluni annertussusaa Danmarkimi Europallu ilarujussuani akuerisaasumit annertunerujussuuvoq, taakkunanimi 0,1 mikrogram-iummat.
Akuutissallu iinerani sivisuumik sunniutigisinnaasai misissorneqarnikuungimmata nassaarineqartup avatangiisinut naalakkersuisuusoq Kalistat Lund aarlerilersippaa.
Tusagassiuutinut nalunarummi oqarpoq:
- Imermi imigassatsinni tissalukaarutit sinnerinik allatulluuniit mingutsitsinerit akuussanngillat, taamaattumillu mingutsitsinerup aallaavia iternga tikillugu paasiniarneqassaaq.
