Nuummi coronamik tunillatsissimasunik nutaanik ullut qulissaanni paasisaqartoqanngitsoq
Nunatta nakorsaanera nunatsinni misissuinernit nutaanit akissutissarseqqippoq. Ullullu qulissaani nutaanik tunillatsissimasoqanngilaq.
Misissuinerit 16-it ullumi akissutissarsineqarput, tamarmik tunillatsissimanngillat. Namminersorlutik Oqartussat tusagassiuutinut naatsumik taama nalunaaruteqarput.
Coronavirusimik tunillatsissimasut katillugit aqqaniliusimapput – tamarmik Nuummiillutik. Taakkulu tamarmik maanna peqqisseqqissimapput.
Nunatsinni coronavirusimik tunillatsissimasutut paasineqartut kingulleq apriilip ulluisa sisamaanni paasineqarpoq.
AAMMA ATUARUK Tamaat isigalugu: Coronavirus pillugu killiffik
Københavnimi Kalaallit Peqqissartut Illuanni najugaqartoq ataaseq apriilip ulluisa qulinganni tunillatsissimasoq paasineqarpoq. Danmarkimut peqqissariartortoq nunatsinnut angerlariartuleraluarpoq, nunatsinnullu angalasussat allat assigalugit taanna misissorneqarpoq.
Nakorsaaneqarfiup misissuinerit 44-it paasisaqarfiginissai maanna utaqqivai.
Nunatsinni inuit katillugit 942-t misissorneqarput.
Inerteqquteqarnerit mianersortumik qasukkarneqassasut
Nuummi coronamik tunillatsissimasoqarnerata kingunerisaanik killilersuinerit inerteqqutillu sukannersut maanna qasukkarneqariartulerput.
Naalakkersuisut siulittaasuata, Kim Kielsenip oqarnera naapertorlugu ilinniarfeqarfiit ilaat ammaqqikkiartulerput aamma tunillatsissimasunik allanik paasisaqartoqanngippat atuarfiit paaqqinniiffiit sapaatip-akunnerata tulliani aamma ammaqqissinnaassagunarput.
AAMMA ATUARUK Napparsimavit, peqqippit angerlarsimaannaqqusaavilluunniit? Taamaappat innersuussutit qimerluukkit
Atuarfiit paaqqinniffiillu marsip ulluisa 18-ianniilli matoqqalerput.
Piniarfinnut Nuuk Centerimi matoqqalluinnangajassimasuniissimasunut aamma nutaarsiassatsialaqarpoq.
Pisiniarfiit Nuuk Centerimi quleriiaat aappaanniittut aqagu pingasunngornermi ammaqqissapput.
Imigassap inerteqqutiginera pingasunngornermi qaangiutissasoq
Imigassap inerteqqutigineqarnera aamma qaangiuppoq. Illoqarfiit pingaarnersaanni imigassat procentillit aqagu quliniit pisiarineqarsinnaaleqqissapput.
Nujaleriffiit, timigissartarfiit, timersortarfiit, timimik sungiusaasut allallu apriilip ulluisa 30-aatinnagu ammassanngitsut, Naalakkersuisut nalunaarutigaat.
Illoqarfiit pingaarnersaata avataani tunillatsissimasoqanngilaq. Taamaakkaluartoq timmisartukkut angalanerit inerteqqutigineqarnerat apriilip ulluisa 30-annut sivitsorneqarpoq. Tamanna nunatsinnit nunatsinnullu atuuppoq.
Nunatta iluani angalanerit aamma apriilip ulluisa 30-aatinnagu aamma periarfissaanngillat.
