Napparsimavit, peqqippit angerlarsimaannaqqusaavilluunniit? Taamaappat innersuussutit qimerluukkit
Angerlarsimaannaqqusaasut qimmimik aneerussisinnaappat, tunillanneqarsimasinnaasutullu ilimanaateqarluinnartut bussersinnaappat?
Nalorniguit coronavirusip siaruatsaaliorneranut innersuussutit pillugit takussutissiaq uani misissoruk.
Kikkulluunniit ornittagaanniinnermi inunnut allanut qanillattunnginnissamut innersuussutit innuttaasunit tamanit malinneqassasut, nunatsinni oqartussat tunngaviusumik innersuussutigaat.
Inuilli amerlanerpaat aappaminnik pisuttuaqateqarnissaat, qimmiminnik aneerussinissaat meeqqanilluunniit aneeqateqarnissaat akorngutissaqanngilaq. Inunnulli allanut qanillattunnginnissaq innersuussutaavoq, angerlaraannilu assaat errortornissaasa eqqaamanissaa pingaaruteqarpoq.
Inuilli immikkut mianersortariaqartunik aamma ilaqarput.
Immikkut mianersortariaqartut angallatileruttorfiit ingalassagaat
Anigorsinnaanngisamik nappaatillit, tuberkuloseqartut naartusut 80-ileereersulluunniit immikkut mianerisarialittut aarlerinartorsiortutullu nunatsinni oqartussanit nalilerneqarput.
Taamatut nalilerneqarsimagaanni niuerniarnermut tamanulluunniit angallassissutinut ilaanermut innersuussutit malinnissaat pisariaqarpoq.
AAMMA ATUARUK Tamaat isigalugu: Coronavirus pillugu killiffik
Immikkut mianerisariallit sapinngisamik anisassanngillat, anisariaqavikkunilli angallatileruttorfiit sapinngisamik ingalassavaat. Tamanna angerlarsimaannaqqusaasunut aamma atuupppoq, taakkualu niuerniaqqusaapput, aammali inunnut allanut qanillattornaveersaaqqissaassallutillu angallatileruttorfiit sapinngisamik ingalassavaat.
Taakkua allatut iliornissaannik soorlu niuertarfiliartitsisarnissaannut aatsisartulluunniit nittartakkagaasigut niuerniartarnissaat nunatsinni oqartussanit kajumissaarneqarput.
Ikinngutinnik ilaquttannillu nittartakkakkut pulaartoqarit
Immikkut mianerisarialiunngikkaluaraanniluunniit kaffillinnginnermi, qitornarisap inuuianut atatillugu qaaqqusinnginnermi unnukkulluunniit filmeqateqannginnermi isumalioqqissaarnissaq pisariaqarpoq.
Katerinneq inerteqqutaanngilaq, kisianni ikinngutinut ilaquttanullu pulaannginniarnissaq taakkunanngaluunniit pulaartoqannginniarnissaq innersuussutaavoq. Meeqqat meeraqatiminnik pinnguaqateqaqqusaapput ilinniagassereqateqaqqusaallutillu, kisianni ataasiinnarmik amerlanerpaamilli marluinnarnnik pulaartoqartassasut innersuussutaavoq.
AAMMA ATUARUK ASSILIARTAT: Coronavirusi timimi ima iliortarpoq
Katereqateqaranili allatut iliorluni soorlu oqarasuaatikkut videokkulluunniit attaveqaqatigiittarnissaq innersuussutaavoq.
Eqqiluisaarnermut innersuussutit paasiuminartut
Suliffigisami immikkut innersuussutinik coronavirusimik ajornartoornermi atuutilersitsisoqassanersoq suliffigisami nammineq aalajangerneqassaaq. Assersuutigalugu suliffeqarfiit amerlasuut sulisutik angerlarsimaffimmi suleqquaat.
Nunatsinni oqartussat coronavirusimik tunillaassuinaveersaarnissamut innersuussutaat paasiuminartut arfiniliupput, taakkualu kikkunnilluunniit pinngitsoorani maleqquneqarput.