Nuummi boot-campertitsineq oqallisaaqisoq
Boot-campimi ilinniartitsisut ilaatigut tassaapput tarnip pissusaanik ilisimasalik, matematikkimi professori tilluunnermilu europami nunarsuarmilu pissartaq. Inuusuttut timersortillugit sungiusarluarneqassapput, pitsaasunik nerisaqarnissartik ilinniassavaat, taamaaliornikkut atuartitaanermikkut pissarsiaqarluaqqullugit.
-Inuusuttut suliniutip sapaatit akunnerinik aqqalinnik sivisussuseqartup ingerlanerani atuarfimmi najugaqassapput. Ilinniartitsisussanik suliaminnut ilisimaqarluartunik atuiniarluta toqqarsimavarput, taamaaliornikkut peqataasunut maligassiuisuuniassammata. Suliniut nalilersuiffigereerutsigu, ilusissamillu nunap sinnerani atorneqarsinnaasumik suliaqareerutta, najukkani nukiit pitsaasut atornissaat eqqartorsinnaalissavarput. Misiligutigalugu suliniutitut ilikkagaqarfigisinnaasatsitut isigaarput, aammalu inuusuttut iluamik ingerlalersinnaanissaat neriuutigalutigu, Palle Christiansen KNR-imut oqaluttuarpoq.
Boot-campimi peqataasut apersuinikkut immikkut toqqagaasimapput, taamaaliornikkut suliniummik timersornikkut sakkortuupilussuarmik naammassinnissinnaanissaat qulakkeerniarlugu. Atuartut amerlanersaat 18-it ataallugit ukioqarmata angajoqqaavi akuersiteqqaarneqarsimapput, atuartulli boot-campimi aallartippata angajoqqaat sunniuteqaqataasinnaajunnaassapput.
-Misiligutitut suliniut 2 aamma 2,5 mio. kr.-it akornanni akeqassaaq, aningaasaliissutittali amerlanersaat atortunut siunissami suliniutini assingusuni atorneqarsinnaasussanut ataasiaannartumik aningaasaliissutaapput. Aningaasat ilinniartitaanermut naalakkersuisoqarfimmi inuussutissarsiornermullu naalakkersuisoqarfimmi kontuni sinneqartooruteqarfiusuni nassaarisimavagut. Aningaasat atornissaat aningaasaqarnermut ataatsimiititaliamut akuersissutigineqareermata boot-campi aallartipparput, Palle Christiansen oqaluttuarpoq.
Aningaasaliissutit sumut atorneqarnissaat pillugu aningaasaqarnermut ataatsimiititaliamik ilisimatitseqqaarani boot-campimik aallartitsisoqarsimanera naalakkersuinermik sulialinnit tupaallaatigineqarpoq, IA-lu Siumullu mianersoqqusipput.
-Aningaasat kontuni pineqartuni inuusuttunik suliffissaaleqisunik suliffissaqartitsiniarnikkut suliniuteqarnissamut atorneqarnissaat akueraarput, Palle Christiansenimilli boot-campertitsisoqarnissaanik tusagarsimanata. Aamma tilluunnermik nunarsuarmi pissartanut professorinullu Danmarkimeersunut sooq aningaasanik atuisariaqarnersugut paasisinnaanngilara. Nunatsinneersut atorlugit isumagisinnaasariaqarparput, Aqqaluaq B. Egede (IA) oqarpoq.
Aningaasaqarnermut ataatsimiititaliami ilaasortaaqataata Finn Karlsenip Aqqaluaq B. Egede isumaqatigilluinnarpaa, Palle Christiansenillu aningaasanik atuinera allaat tupaallaatiginerarlugu.
-Suliniut tusagaqarfigisimanngivippara, qinnuteqaammi aningaasat sumut atorneqarnissaannik erseqqissumik nassuiaatigineqanngilaq. Avataaneersunilli suliartortitsinermut, kikkuuneri susinnaanerilu apeqqutaatinnagit, aningaasanik taama amerlatigisunik atuisoqarnera pissusissamisuunngilaq, Finn Karlsen KNR-imut aalajangersumik oqarpoq.
