Nuummi anngiortumik taxaassisartut: Taxartitsisut politikerinit iliuuseqartoqarnissaa erseqqissunillu sinaakkusiussaqarnissaa ujartoraat

Taxartitsisut unioqqutitsisumik ingerlatsisunit ilungersuatinneqartutut misigisimapput, ajornartorsiutaasorlu tamanna akerliussutsimik takutitsinerminni politikerinut ukiut marluk matuma siorna takutippaat. Taakku inatsisiliortoqarnissaa ajornartorsiutaasullu ilungersunartumik suliarineqarnissaa piumasaraat.

Sulili iliuuseqartoqanngilaq.

Tamanna pissutigalugu innuttaasut taxanik pissarsiniarlutik ilungersortut amerliartuinnarput – pingaartumik piffissani, assersuutigalugu nunat tamalaat akornanni mittarfiup ammarneqarnerata kingorna aamma akissarsiffinni taxarniartorpassuaqarnerani.

Nuummi mittarfiup ammarneqarata malitsigisaanik Nuummi takornariat amerlanerulerput, taxartartullu tamanna pissutigalugu taxarniartut amerlanerulernerat malugisinnaavaat.

- Mittarfimmut mittarfimmiillu ingerlatsinerit amerlanerungaatsialertut malugivarput. Aasaanerani kaaviiaartitagut pitsaanerulingaatsiartut siorna kisitsisitigut takusinnaavarput, mittarfimmillu pissutaaginnanngilaq. Takornariammi Nuummiittut taxarniartut aamma pineqarput, Nuuk Taximi pisortaq, Janus Eigaard oqarpoq.

Anngiortumik taxaassisartut taxat amerlanerulernissaannut aporfiusut

Naallu takornariat amerliartornerat ilutigalugu ingerlassinerit amerlaneruleraluartut tamanna aamma sunniuteqarnerluppoq.

- Utaqqinerup sivisussusaa aamma ulluni ulapaarfinni, soorlu inuit taxanik akissarsiffinni pisariaqartitsiffiini qanoq isumaginnittarnerput pillugit naammagittaalliuteqartoqarpoq, Nuuk Taxip pisortaa oqarpoq.

Ajornartorsiutaasulli naammagittaalliuuteqartoqarneranit qaangerneqarsinnaanngillat, anngiortumimmi taxaassisartut pissutigalugit taxaatillit amerliliisinnaannginnerannik aamma kinguneqarpoq, aamma naak tamanna atuisartunut pingaartumik ulluni ulapaarfiusuni pitsaanerusumik sullissinermik kinguneqartussaagaluartoq.

- Aningaasaqarnikkut imminut napatissinnaanissaa tassa aporfiuvoq. Taxanit 72-init ullumikkut pigisatsinnit amerlanerusunik peqarnissarput soorunami oqaluuserinikuuarput, kisianni tamanna aamma akilersinnaasariaqarpoq.

Ukiut marluk matuma siorna piumasaqaateqaqqaartut

Taxartitsisut anngiortumik taxaassisartut pillugit ukiut marluk matuma siorna akerliussutsimik takutitsisareersut, Nuuk Taxip pisortaata oqaatigaa:

- Tassunga atuuttumik inatsiseqanngitsoq paasivarput, tamannalu akuerisinnaanngilarput, Janus Eigaard taamani oqarpoq.

- Tassungami tunngatillugu inatsiseqanngilaq tamatumalu taama kinguarsarneqartiginera naammagisimaanngilluinnarparput, Janus Eigaard ukiut marluk qaangiuttut oqaqqippoq.

Pisortap oqarnera naapertorlugu Nuummi anngiortumik taxaassisartut 20-t 30-llu akornanniittut ullut tamaasa angalasarput. Taassumalu facebookimi quppernerit arlallit taxaassinissamik neqerooruteqarfiusut innersuussutigai, taassumalu anngiortumik taxaassisartut qaammammut ataatsimut 1 millionit koruunit missaannik isertaqartarnissaat nalilerpaa.

Taassuma taxartitsisut najukkamut inniminniiffiusumut apuukkaangamik ilaasussap allamut ilaasussanngornini pissutigalugu taxarnissani taamaatikkaa nalunaarfigineqarneq akulikitsumik nalaattaraat oqaatigaa.

Pisorpassuarni anngiortumik taxaassisartut atuisussamit innimiinnarneqartut pineqartarput, ilaasussaq taamaalilluni ingerlassinerup aallartinnerani 20 koruunit saniatigut akiutaasartumut akiliisariaqarunnaartarpoq.

Iliuuseqapallattut nutaamilli suli inatsisiliortoqanngitsoq

Anngiortumik taxaassisartut pillugit inatsiseqarnissaanut atatillugu Danmarkimi angallannermut ministerimut saaffiginnittoqassasoq politikerinit ukiut marluk matuma siorna paasissutissiissutigineqarpoq.

Sulili taamaaliortoqanngilaq.

KNR-ip naalakkersuisoq, Aqqaluaq B. Egede (IA) tassunga tunngatillugu nutaamik qaqugu inatsisiliortoqarnissaanik aamma ukiut marluk maanna qaangiuttut sooq suli iliuuseqartoqannginnera pillugu tusarniaaffiginiarlugu oqaaseqartinniarsarigaluarpaa. Taassumali saaffiginnissuteqarnerput suli akissuteqarfiginngilaa.