Nuuk upernaami aatsaat taama kiatsigisoq - Qarlippaaqassaareerpunga

Nuummi marsimi sila kiappoq, DMI-milu naapertorlugu aatsaat taama kiatsigaaq. Tamanna Nuummi innutaasut amerlanersaasa maluginarpaat.
Nuummi sila aatsaat taama kiatsigaaq. Kiannera Hansigne Olsenip nuannaarutigaa, quasammalli ajaapppiartarpoq. Foto © : KNR / Carsten Fauerschou Assi © : KNR / Carsten Fauerschou
marsip 24-at 2023 15:53

Nuummi seqinnerpoq, pisuinnaallu seqinersiuserlutik pisupput.

- Kiatsiaarsuaartoq malugaara, aasarsiornaasapporluunniit sapaatip-akunnera kingulleq. Ullumikkut nillilaarpoq anorlerluni kisianni seqinnerluni, Isabella Heilmann Lyberth qungujulalluni oqarpoq.

Issaasannerali aputillu aattulernera nuannersuinnaanngilaq.

- Kiattorujussuunera nuannersorujussuuvoq, kisianni aqquserngit quasattorujussuupput ulorianaqalutillu, Hansigne Olsen ajaappissani paaralugit oqarpoq.

Marsi qaammat pisarnermit kianneruvoq. Nuummi ukioq kingulleq 2022-mi marsimi kiannerpaagami 5,6-inik kiappoq, ukioq mannalu marsip qaammataa suli naanngikkaluartoq kiannerpaagami 15,2-inik kiappoq.

- Aqqusinermi sermeq aattulersoq takuara, kisianni anilluni qiianaqaaq, Gunda K. Jakobsen.

Naqitsiniisaffik sakkortooq pissutaasoq

nalunaarsorneqarpoq.

DMI-mi silasiortup Thor Hartzip qarasaasiamini nalunaarsukkat takutippai. Nalunaarsukkat allanngoraqisut.

Marsip aallartisimalernerani kiatsipiloorami qulit tikillugit kiappoq.

- Marsip sisamaanni 15,2-nik kiammat Nuummi marsimi aatsaat taama kiatsigaaq, taanna oqarpoq.

Tamanna naqitsiniisaffiup sakkortuup kujataaniit avannamut ingerlaarneranik pissuteqarpoq.

Nunatta kujataata-kippasissuani naqitsiniisaffiup anoraa sakkortooq nunasarnerlu anorlertitsimmata uuma qaammatip aallartisimalernerani kiannera pissuteqarpoq.

- Ukioq kingulleq agguaqatigiisillugu 1,3-niit 4 gradit tungaanut pisarnermit issinneruvoq. Ukioq kingulleq marsi ukioq mannalu marsi assigiinngeqaat, Thor Hartz oqarpoq.

Kianneruneralu innuttaasut aqqusinermi naapitatta iluarilluinnarpaat.

- Qarlippaaqassaareerpunga. Malunnartorujussuuvoq sualummik avannaaninngaanneersuulluni, ukiut arlallit maaniikkaluarpunga kisianni malunnaqaaq maani massakkut. Eqqarsarpunga massakkut soorlu apriilip naalernerata silaa. Neriunniarta aprili maajitut misiginassasoq, Hansigne Olsen oqarpoq.

Nuummi silap kiassusaa marsip sinnerani allanngorartuunavianngitsoq, ullullu amerlanerit seqinnertassangatinneqartoq, DMI-mit ilanngullugu oqaatigaat.