Kiatsikkiartorpoq: Nuummi 1784-miilli aatsaat taama kiatsigaaq
- 1784-miilli Nuummi septembarimi aatsaat taama kiatsigisoq takuarput, DMI-mi silasiornermik ilisimatusartoq Caroline Drost Jensen taama KNR -imut oqarpoq.
Illoqarfiit pingaarnersaanni septembarimi qaammammi agguaqatigiissillugu kiassuserisartagaanit 3,5 gradinik kiannerusimavoq, 7,4 gradinik kiassimalluni.
Silap pissusia nalinginnaasoq
Sumiiffimmi aalajangersimasumi silap ukiuni kingullerni 30-ni pissusia qanoq issimanersoq, nalunaarsukkani silap pissusianut tunngasuni ersertarpoq. Nalunaarsukkat silap pissusianut tunngasut allaatigisami uani taaneqartut 1991-ip 2020-llu akornanneersuupput.
Nalunaarsukkat taakku silap maanna qanoq innera siornatigut qanoq issimaneranut sanilliussinermi najoqqutarineqarsinnaapput.
Silallu qanoq ikkumaarneranik ilimasaaruteqarnermi aamma najoqqutarineqarsinnaapput.
Nuummi septembarimi nalinginnaasumik 3,9 gradinik kiattarpoq.
Nuummi uuttortaanikkut paasisani siulleq 1784-iminngaanneerpoq.
Nuummili kisiat aatsaat taama kiatsiginngilaq. Caroline Drost Jensen naapertorlugu Kalaallit Nunaanni ukiaq manna nalinginnarmit kiannerusimavoq.
Paamiuni, Narsarsuarmi, Qaqortumi, Summit Campimi Sermersuarmiittumi, Pituffimmi Kangerlussuarmilu aamma nalinginnarmit kiannerusimavoq.
AAMMA ATUARUK Septembarip qaammataa nunatsinni aatsaat taama kiatsigisoq
Sermersuarmi Summit Campimi ukiaq aatsaat taama kiatsigisoq uuttortarneqarsimarpasippoq. Novembarimi ullut arfinillit pillugit paasissutissat DMI-p pissarsiassatut amigaatigai, taamaattumik Caroline Drost Jensenip qulakkeerlugu tamanna oqaatigisinnaanngilaa, kisianni taanna naapertorlugu taasassap eqqornissaa ajornanngilaq.
- Taqqamani aatsaat taama nalinginnarmit kiassimatigaaq, tamanna qularnanngilaq.
Kiatsikkiartortoq
Ukiut marluk matuma siorna Nuummi decembarip 27-anni 13,3 gradinik kialluni decembarip qaammataa aatsaat taama kiatsigisimavoq.
Siorna Nuummi decembari aappaattut inissilluni aatsaat taama kiatsigisimavoq.
AAMMA ATUARUK Juulli aputeqarpianngitsoq: Nuup decembarimi kiannerpaaffigisimasani angungajakkaa
Ukiorlu manna ukiap nalinginnarmit taama kiatsigisimanera nalinginnaaleriartorpasippoq.
Caroline Drost Jensen oqarnera naapertorlugu silap pissusiata allanngoriartornera peqqutaavoq.
- Ilisimavarput silap pissusiata allanngortiartornera avannarparteriartornermi sukkanerusumik ingerlasoq. Tassa assersuutigalugu Danmarkimi takusinnaasatsinnut sanilliullugu sukkanerusumik pivoq, taanna oqarpoq.
Silap pissusianik ilisimatusarnerup iluani sila silallu pissusia assigiinngissuteqarput. Sila maannakkut qanoq inneranik takutitsisuuvoq, tassa ullormi pineqartumi kiassutsimik ersertitsisoq, silallu pissusia piffissap sivisuup iluani pisarluni, assersuutigalugu agguaqatigiissillugu ukiunik 30-nik paasissutissartaliusumik.
Silap pissusia kianneruleraagat silamullu atatillugu pisoqaraagat Kalaallit Nunaannut silaannarmik kiattumik nassataqartitsisumik, taava silap pissusia kiannerusoq silamut atatillugu pisuni kiannerulersitsisarpoq.
- Pisut marluk ataqatigiipput taakkualu kiannerulernermik inerneqartitsisarput, pissutigalugu toqqaannaq ersinngitsumik avannarpasinnerusumi silatta pissusia kiannerummat, Caroline Drost Jensen oqarpoq.
Danmarkimi apisoq nunatsinniunngittorli
Sapaatip akunnerani uani Danmarkimi apivoq. Jyllandip avannaamiut pingasunngormat iteramik naatsiivi biiliilu apummik qallerneqarsimapput.
Nunatsinnili sumiiffinni arlalinni kiannerulersimavoq Nuummilu aputaarutingajassimalluni.
Aalborgimi decembarip 7-ianni nittaatsoq. Assi: Scanpix.
Naalagaaffeqatigiit nunaanni immaqa ataqatigiittoqarpoq, Caroline Drost Jensen oqaluttuarpoq.
- Malinneqarsinnaasuuteqarpugut eqquukkajottoq tassaavorlu Danmarkimi kiakkaagat Kalaallit Nunaanni killormoortarpoq, taanna oqarpoq.
Tamanna sapaatip akunnerani uani eqquuppasippoq.
Taamaattorli Danmarki aamma ukiaq manna kiappoq soorluttaaq nunatsinni kiassimasoq.
- Tamanna immikkut maluginiartarparput, Caroline Drost Jensen oqarpoq.
Juullikkunni nittaassinnaasoq
DMI KNR-imut oqarpoq Nuummi decembarip qaammataa nalinginnarmit panernerullunilu kiannerussangatinneqartoq.
Sapaatip akunnerani uani anorlingaatsiarsimavoq, anorili aamma sakkukillissangatinneqarpoq.
Qulit tikillugit ississaaq. Tamanna ukiuni marlussunni kingullerni takusimasatsinniit nillerneruvoq, silalli pissusianut naleqqiullugu kiannerulluni.
Matin Lindbergip, piffissami sivisuumi DMI-mi silasiortuusup, eqqoriarsinnaavaa juullikkunni apissasoq.
- Aap, juullikkunni nittaannissaa ilimanarpoq, kisianni annertunngitsumik, taanna KNR-imut oqarpoq.
Illoqarfiit pingaarnersaanni inuit nalinginnaasumik aputeqartorujuunissaa ilimasuutigisinnaaneq ajorpaat. Naak una qaammat decembarimi nittaalaartarnissaa ilimanartoq aputeqarujukkunnanngilaq.
