Nuuk Marathon annikillisamik pisussanngorpoq
Nuuk Marathonip ukiunik 30-nngortorsiornera ukiormanna augustip arfineq pingajuani arpannissami malunnartinniarneqassamaaraluarpoq. Arpattut arlallit Danmarkimiit tikissamaaraluarput.
AAMMA ATUARUK Aasiaat Midnight Sun Marathon Aasiammiuinnaat eqqamiuinnaasalu arpaffigissagaat
Inuilli katerisimaartarnerannut namminersorlutik oqartussat nalunaarutaat pissutigalugu arpanneq oqaluttuassartaqaqisoq allaanerusumik ingerlanneqartussanngorpoq.
- Allatut iliorsinnaannginnatta nalunaarummi maleruaqqusat malittariaqarpagut. Taamaattumik arpanneq Nuummiunit taamaallaat peqataaffigineqarsinnaavoq amerlanerpaamillu 100-ut peqataasinnaallutik. Nalunaartut siulliit 100-ut kisimik peqataasinnaapput, Nuuk Maratonimik aaqqissuisuniit Kim Godtfredsen oqarpoq.
Isiginnaartut ikiuuttullu
Isorartussutsit arpaffigineqartussat tassaapput 10 kilometeri, halvmaraon 21 kilometeriusoq kiisalu marathon 42,1 kilometeri.
Aasiaat Midnight Sun Marathon aamma nunaqqatigiinnit taamaallaat peqataaffigineqartumik tallimanngorneq junip 26-at pissaaq. Inuit katerisimaartarnerannut nalunaarut augustip aallaqqaataata tungaanut atuuttussaq pissutigalugu isikkamik arsaannermi GM aamma taamaatinneqarpoq.
AAMMA ATUARUK Arsaannermi GM taamaatinneqarpoq
Nuuk Marathonimik aaqqissuisut pisussami immikkuualuttut pilersaarusiorlugit sulia aallartinngillat. Tassami ikiuuttut aamma isiginnaariat inissaqartussaapput arpanneq Nuup ilaani Qinngutsinni aallarfeqarluni apuuffeqarluni pilerpat.
