Nuuk Imeq: Sukkunut akitsuut peqqutigalugu 2-literinik saftiliorunnaarpugut

Tunguarnitsunik, sukkunik sodavandinillu akitsuutit qaffanneqarmatali saftit tunisassiat amigartoorutaaleriartuinnavissimapput tamannalu sulisunik marlunnik annaasaqaataaffiusussanngorpoq.

Saftit liiterit marlukkaartut ukiumut 600.000-inngorlugit maqinneqartarsimagaluarput, taamaattoq sukkut, sodavandit assigisaallu akitsuutit qaffanneqarnissaat inatsisartuni 2007-imi oktobarip 19-ani aalajangiiffigineqarmalli maannamut saftit liiterit marlukkaartut tunisaaneri amigartoorutaasarsimammata oqaluttuaannanngortussanngorput.

-Saftit tunisaajunnaartussanngornerat uggornarpoq, saftinik pisisartut ilaat Poul oqarpoq.

Sukkunut assigisanullu akitsuutit qaffaanneqarmatali saftit liiterit marlukkaartut ukiumut 600.000-it tunineqartaraluartut maannamut affaannanngoreersimapput.

Akitsuutit qaffattussanngormata Siumukkut Atassutikkullu akitsuutinik qaffaanerminnut atatillugu oqaatigaat pinaveersaartitsineq anguniarlugu sukkunut, sodavandinut, sikaritsinut imigassanullu akitsuutit qaffanniarneqartut.

Nuuk Imermiilli akerliusoqartuartaraluarpoq – Kalaallit Nunaanni tunisassiat avataaneersunut sanilliullugit pingaartinneqarnerusariaqaraluarmata.  

-Kalaallit Nunaanni tunisassiat avataanisuullu saftit tunisassarineqartut akitsuuteqarnermikkut assigiinnginnerat eqqumiiginarpoq, Nuuk Imermi pisortaq, Bernhard Christensen isumaqarpoq nangillunilu:

Pisiniarfiit suleqatigalugit arlaatigut periarfissarsiorsinnaaneq eqqarsaataagaluarpoq saftinilli maqitsisaleqqittoqassagaluarpat tamanna ajornaatsuinnaanavianngilaq.