Nuuk Imeq: Puiaasanik utertitsisarneq atorunnaassappat eqqugaassaagut
Immiaaqqat sodavandillu qanorluunniit pooqaraluartut tikisinneqarsinnaalissappata Nuuk Imeq ulorianartorsiulissaaq.
Allattoq Dorthea Johansen
marsip 12-at 2014 12:30
Namminersorlutik Oqartussat puujaasanik utertitsisarnermut tunngasunut malittarisassanik allannguiniarlutik nalunaaruteqarsimapput. Sodavandit immiaaqqallu puui qillertuusat atorneqalissasut eqqarsaataasunummi ilaammat.
Nuuk Imermi siulersuisuni siulittaasup Justus Hansenip Naalakkersuisut pilersaarutaat annilaanngatigaa.
- Pinngortitaq eqqarsaatigalugu tamanna ernumanarpoq. Minnerunngitsumillu piffissami matumani suliffeqartut 48-uummata. Sulisulli 48-t kisimik eqqorneqartussaanngilaat. Assartuinermimi sulisoqarpoq, assartuinermi containerinik suliaqartunik aamma sulisoqarpoq, kiisalu puujaasanik utertitassanik aamma suliaqartoqarluni, Nuuk Imermi siulersuisuni siulittaasoq Justus Hansip oqarpoq.
Suliffeqarfik matusariaqalissappat annaasat ikinnerutinniarlugit puisaanik utertittakkanik 11,6 millionik koruuninik Nuuk Imeq nalikilliliisimavoq. Tamanna pivoq Namminersorlutik Oqartussat utertitsinissamut tunngasunut malittarisassanik allannguiniarlutik nalunaaruteqareersullu.
Puiaasanik utertitsisarnerup atuutiinnarnissaa, suliffeqarfiullu atuutiinnarnissaa suliffeqarfiup ilungersuutigaa. Tamaaliornerli ajornakusoortoq, Nuuk Imermi siulersuisuisa siulittaasuat oqarpoq.
- Naalakkersuisut piumaffigisinnaavagut suliassanngortitseqqissasut, uagullu oqaloqatigaluta tamanna aaqqissuussinnaagaat. Tusarniaaffigineqarsinnaavugut, Nuuk Imeq qanoq iliorsinnaanersoq tusarniaaffigineqarnitsinni utertitsisarneq annaanniarsinnaavarput, Justus Hansen oqarpoq.
Naalakkersuisut puujaasanik utertitsisarunnaarnissaannik suliniuteqarnerat suli qulakkeerneqanngikkaluartoq, suliffeqarfik aalajangersimavoq piginneqataasunut piviusoq nalunaarutigissallugu, tassa Nuuk Imeq qaqugukkulluunniit matorataariaannaasoq, Justus Hansen oqarpoq.
- Siunissaq eqqarsaatigalugu piareersimasariaqarpugut, taamaattumik piginneqataasut ilumoortoq pillugu nalunaarfigisariaqarpagut. Tamannali ersisaarutaanngilaq, piginneqataasut 100 procentimik tapersersuipput, Justus Hansen oqarpoq.
Puujaasanik utertitsisarneq Qaanaami tunumilu atuutinngilaq.
Immiaaqqanik sodavandinillu maqitsisarfik Nuuk Imeq pilersinneqanngikkallarmat, puuiaasaaqqanillu utertitsisarneq atuutinngikkallarmat, nunarput qanoq isikkoqarnersoq amerlasoorpassuit eqqaamassajunnarsivaat. Qillertuusat puiaasaaqqallu seqummakkui illoqarfinni pinngortitamilu tamani tamaani takussaallutik. Tamakkulu takussaaleqqeratarsinnaasut, Justus Hansen isumaqarpoq.
