Nuuk Imeq kaaviiaartitaqarnerusoq
Tusagassiuutinut nalunaarummi oqaatigineqarpoq, immiaaqqanik sodavandinillu pilersuisup taassuma kaaviiaartitai 4 procentinik amerleriartut, tassa 2013-imi 185,6 millionit koruunioriarlutik 2014-imi 192,5 millionit koruuninut amerleriarmata.
Nuuk Imermit ilisimatitsissutigineqarpoq, suliffeqarfiup sodavandinik tunisai 2 procentinik amerleriaateqartut, immiaaqqallu tunisat allannguuteqanngitsut.
Immiaaqqalli tunisat allanngoriannginnerat pitsaasumik tupaallaataavoq, tassa immiaaqqat tunisat ukiorpassuarni ikiliartornikuummata.
AAMMA ATUARUK Nuuk Imeq: Puiaasanik utertitsisarneq atorunnaassappat eqqugaassaagut
Annaasaqarsinnaanini sillimaffigaa
Immiaaqqat sodavandillu qillertuusanik puiaasaaqqanillu ataasiaannarlugit atorneqartartunik puullit eqqussat tuninineqarsinnaanerisa akuerineqarnissaat siunetaralugu puut pillugit malittarisassat allanngortinnissaannik Namminersorlutik Oqartussat nalunaarutaat piviusunngussappat, Nuuk Imeq matusariaqassappat ilaatigut annaasaqarnissaq sillimaffiginiarlugu 2013-imisuulli 2014-imi puut 11,6 millionit koruuninik immikkut nalikillilerneqarput.
AAMMA ATUARUK Nuuk Imeq matusariaqarsinnaavoq
Immiaaqqanut sodavandinullu akitsuutit saniatigut Nuuk Imeq 2014-imi pisortat karsiannut akileraarutinit, piginneqataassuteqarnermi pissarsianit sukkunullu akileraarutinit 33,3 millionit koruuninik aamma akiliuteqarpoq.
Nuuk Imeq piffissaq tamaat sulisartunik 2014-imi 45-nik sulisoqarpoq. Suliffeqarfimmullu piginnittuullutik Carlsberg Bryggerierne, Royal Unibrew aamma Kommuneqarfik Sermersooq.
Kommunalbestyrelsimi ilaasortaq Justus Hansen siulersuisuni siulittaasutut qineqqinneqarpoq.
