Nuuk, Illoqqortoormiut Tasiilarlu kattutissapput

Illoqqortoormiut Ammassallillu kommuniisa Nuup kommuneanut kattukkumallutik saaffiginnissutaat Nuup kommunalbestyrelseanit tamarmiusumit ullumi akuersaarneqarpoq. Illoqqortoormiut Ammassallillu saniatigut Paamiut kommuneat Ivittullu kommuniisa Nuummik kattuteqateqarnissaat suliarineqarmat, Nuuk siunissami nunarsuarmi kommuneqarfiit annerpaat ilaattut taaneqarsinnaalissaaq. Kommunimi aalajangernertik pillugu borgmester Agnethe Davidsen ima oqarpoq:

- Kommunit taakku marluk saaffiginnissutaat Nuup kommunalbestyrelseata qujallutik tiguaat.

Tassa Nuuk, Paamiut, Ivittuut, Tasiilaq Illoqqortoormiullu kommunerujussuanngussasut borgmesteri uppernarsaavoq.

Kommunit Tunumiittut akuerineqarnerannut Tasiilami takornariaqarnikkut ingerlatsilluarneq Illoqqortoormiullu avannaanni nunarujussuaq eqqissisimatitaq tunngaviunerpaasut borgmesteri oqarpoq.

- aalajangernitsinnut Illoqqortoormiuni nunap eqqissisimatitap ilanngullugu tigunissaa siunniunneqarpoq. Ilaatigut nunamik mingutsitsinnginnissaq eqqarsaatigiinnarluguluunniit, tassani kommunit annertuumik suliassaqarmata. Tamaattumik isumaqarpugut naapertuutissasoq aqutsineq kommuninut aamma tunniunneqarpat.

Nuup kommunalbestyrelseata Paamiuni Ivittuunilu kommunalbestyrelsii piareersarnermut atatillugu ungasinngitsukkut ataatsimeeqatigipput tikinngikkaluarlugit ungasissumut attaveqaat videokonference iluaqutigalugu. Agnethe Davidsen oqarpoq Illoqqortoormiut Tasiilallu kommunii periareersarnermut atatillugu aamma taamaattumik ikkussiviginqarumaartut.