Nuuk Couture Copenhagen Fashion Weekimut peqataarngaartoq

Atisanik ilusilersuisartut Københavnimi immikkut ittumik aaqqissukkamik sapaatip-akunnerititaat, atisanik, kamippannik pinnersaasianillu mutinik saqqummersitsiviusoq Copenhagen Fashion Week ullumikkut ammarneqarpoq.
Assi © : nuukcouture.gl
aggustip 05-at 2015 07:18
Nutserisoq Mads Lynge

Kalaaleq atisanik ilusilersuisartoq Louisa Lynge Hansen, Nuuk Couturemik aallarniisoq, saqqummersitsinermi siullerpaamik peqataavoq, Copenhagen Fashion Weekimilu saqqummersitsiveqarluni.

Greenland Venturemit ilaatigut aningaasalersorneqarnermigut saqqummersitseqataalerpoq. Taassuma saniatigut Great Greenland suleqatigalugu atisanik ilusilersuinissamik isumaqatigiissusiornikuuvoq. Nuuk Couture ApS tusagassiuutinut nalunaarummi ilaatigut taama allaaserisaqarpoq.

 

Nunani allani tuniniaarusuttoq
- Suliffeqarfiit taakku marluk peqataanerisigut Nunatsinni tuniniaanerup, nunanilu allani tuniniaanerup annertusarneqarnissaa neriuutigaarput. Kalaallit Nunaat avammut nittarsaanneqassaaq, nunat allat kalaallit tunisassiaannik ilusilersugaannillu ilisimasaqarnerulissallutik, Nuuk Couture ApS ilaatigut taama allaaserisaqarpoq.
 
Great Greenlandip Nuuk Couturellu peqataanerisa saniatigut, atisanik ilusilersuisartut Isaksen Design Copenhagen Fashion Weekimi pisarneq malillugu aamma peqataapput, ullumimiillu tallimanngorneq ilanngullugu saqqummersitseqataassallutik.

Bibi Chemnitz Copenhagen Fashion Weekimut aamma ilaavoq, saqqummersitsinermullu Revolverimut Øksnehallenimi pisumut peqataassalluni.