Nuuk AWG 2016
Issittormiut unammiuaarnissaanni Arctic Winter Games 2012-imi peqataasussat 129-t, aqutsisut sungiusaasullu, eqqumiitsuliortut tusagassiortulllu, tamarmik katillutik 150-it missaanniittut, Canadami Yokon-imi illoqarfimmut White Horse-mukarlutik ullumi ullup qeqqanut Kangerlussuarmit aallassaput.
Timmisartumut aamma ilaasussanut ilaapput, Kommuneqarfik Sermersuumi borgmesterip tullia siulleq Per Berthelsen aamma Piorsaanermut Ingerlatsivimmi pisortaq William Kriegel, ilaatigut Arctic Winter Games 2016-ip Nuummi aaqqissuunneqarnissaanik isumaqatigiinniartussaasut.
Arctic Winter Games 2016-ip aaqqissuunnissaa Namminersorlutik Oqartussat, Kommuneqarfik Sermersuup Nunavuullu suleqatigiissutigissagaat siunnersuutaavoq.
Matumani Nunarput tikeraartitsisuussaaq, sikumi sukuutserluni unammiuaarnerit Nunavummi aaqqissuunniarneqartut eqqaassanngikkaani, unammiuaarnerit Nuummi pisussaassallutik. Nuummi sukuutsertarfimmik sananissap akisuallaarnissaanik naliliinerit tamatumani patsisaapput.
Aaqqissuisuunissamik qinnuteqaat naatsorsuutigineqartutut akuerineqassappat, taamanikkornissaanut nunat allamiut timersortartut, kulturikkut suliallit tusagassiortullu 1300-t missaanniittut Nuummi tikeraartorineqassapput.
Arctic Winter Games 2016-imik aaqqissuisuunissamut atatillugu, AWG-ip nunani tamalaani Komité-anik isumaqatigiissuteqarluni atsioqateqarnissamut, Per Berthelsen Kommuneqarfik Sermersuumi kommunalbestyrelsimit piginnaatinneqarpoq. Sapaatiuppat marsip sisamaani atsioqatigiittoqarnissaa naatsorsuutigineqarpoq.