Nuuk attaveqaasersuinermi nutaamik datacenterertaassasoq

Nuuk nutaamik datacenterertaassaaq, taannalu aappaagu naammassineqassalluni.

Tusass tusagassiuutinut nalunaarummi allappoq. Centerip attaveqaasersuiffiussasoq, Tusassimi pisortap tullia, Jonas Hasselris, oqarpoq.

- Nuummi nutaaliamik datacenteritaarnissaq pisarialimmik attaveqaasersuisinnaanissamut pingaaruteqarluinnarpoq. Attaveqaasersuinissamut isumannaallisaaneq kisimi pineqanngilaq, inuiaqatigiinnili isumannaallisaanermut aamma attuumassuteqarmat, taanna oqarpoq.

- Siunissami Nunatsinni attaveqaatitigut isumannaallisaanermut annertuumik aningaasaliissamaarpugut.

Attaveqaasersuutit assersuutigalugu qarasaasianut kabeliusinnaapput.

Permagreen sanaartussasoq

Permagreen sanaartugassanik suliaqartuussaaq 155 millionit koruunillu atorneqarnissaat missingersuutigineqarluni.

Datacenteri illoqarfiit pingaarnersaata ilaani Qinngorpumi innaallagialersuummi sillimmatimik, nillorsaammik attaveqaatinillu peqartumik sanaartorneqassaaq. Tusassip tusagassiuutinut nalunaarutaa naapertorlugu tamanna Tusassimut "oqarasuaatitigut internettimullu atortorissaarutinik pisariaqartunik inissiisinnaanissaanut periarfissiissaaq".

Sanaartorneq piaartumik aallartinneqassasoq

- Suliniummut taama pingaaruteqartigisumut ilaanissarput nuannaarutigeqaarput. Datacenterimillu suliffeqarfinni piumasaqaatinik annertuunik piumasaqaatitalimmik aammalu inuiaqatigiinnut qarasaasiatigut siunissaannut pisariaqarluinnartumik pilersitsiniarnermi naammassinnilluarnissarput qilanaaralugu, Permagreenip pisortaa, Jeppe Bloch Steffensen, oqarpoq.

Imaatigut kabelit maluginiutinik illersorneqassasut

Attaveqaasersuutillu piffissami matumani isornartorsiorneqarput. Østersømi imaatigut kabelit arlallit akornuserneqarnikuupput. Imaatigut kabelit immap naqqaniipput, assersuutigalugu kilisaammit ajoquserneqariaannaallutik. Kilisaat Isortaq 2019-mi Sisimiunit kujammut 30 kilometerinit ungasitsigisumi taama pisoqarpoq, tassa kilisaat imaatigut kabelimut qanillivallaarpoq kabelilu kittorarlugu.

Kabelip ajoqusernera pissutigalugu Sisimiunit Upernavimmut inuit apriilip qiteqqunnissaata tungaanut arriitsuarannguamik internettimik kisimi atuisinnaasut KNR-ip siusinnerusukkut saqqummiunnikuuaa.

Internettip arriingaatsiarnera internettimut attaveqaasersuutip radiut atassuteqaqatigiiaatigoornerannik pissuteqarpoq.

Imaatigulli kabelip kittorarneqarnera ajoqusiinermik aamma pissuteqarsinnaavoq – taamaammat nunatsinni imaatigut kabelit illersorluarneqarnerussasut, Tusassip pisortaanera, Toke Binzer isumaqarpoq.

Taassuma sermitsiaq.ag-p allaaserisaa naapertorlugu atlantikup avannaani nunanut attaveqatigiilersitsisumik, imaatigut kabelimik nutaamik immap naqqani maluginiutitalimmik erngertumik peqalernissaa kaammattuutigaa.

Maluginiutilli imaatigut kabelimut ikkussimasut Tusassip pisortaata oqarnera naapertorlugu umiarsuit suut imaatigut kabelimut saneqqunnersut takusinnaassavai.

- Taamaalilluni imaatigut kabelimut ajoquserneqarsinnaanerat takuneqarsinnaallunilu pinngitsoortinneqarsinnaassaaq, taanna sermitsiaq.ag-mut oqarpoq.