Isortaq Trawl immap naqqatigut kabeli aqqutalugineqarluni aserortoq pillugu taarsiisussanngortitaasoq

8,2 millionit koruunit suliamullu aningaasartuutit.

Tassa Isortaq Trawl taamaattoqarneranut taama amerlatigisunik immap naqqatigut kabeli 2019-imi aqqutalugineqarluni aserornera pillugu Nunatta Eqqartuussisuuneqarfiani suliami akisussaatinneqarluni taarsiisussanngortitaavoq.

Kilisaataatileqatigiiffiummi kilisaataataata ilaata Sisimiuniit 30 kilometerit missaattut kujasitsigisumiittumi immap naqqatigut kabeli qanillivallaarlugu 2019-imi januaarimi aqqutalugimmagu aserorpoq.

Tusassip taamaattoqarneraalluni oqarnera ilumoortoq eqqartuussivimmi ukioq manna marsip ulluisa 25-anni uppernarsarneqarpoq, Tusassilu suliami tassani taamaalilluni ajugaalluni.

Taamaammat Isortaq Trawl katillugit 9,7 millionit koruuninik taarsiisussanngortinneqarnermi saniatigut aningaasat taakkua erniaannik suliamullu tassunga aningaasartuutinik aamma akiliisussanngortinneqartoq, Tusass KNR-imut ilisimatitsivoq.

Suliaq naammassereerpoq

Immap naqqatigut kabelip taassuma meterit 200-t missaanni ititigisumiittup qanittuani kilisattoqaqqusaannginnera sumiinnersorlu takuneqarsinnaaqqullugu immap assinganut nalunaarsoqqanera tunngavilersuutigalugit Tusassip kilisaataatileqatigiiffik taanna eqqartuussivilersuuppaa. 

Isortaq Trawlillu kilisaataataa unioqqutitsisimasoq, Tusass taamaammat isumaqarpoq.

- Tassa immap naqqatigut kabel taanna sumiinnersoq umiarsuarnit qanittuaniittunit alaatsinaanneqarsinnaajuaannarpoq, Tusass Isortaq Trawl eqqartuussivilersuummagu oqarpoq.

Isortaq Trawlili taama amerlatigisunik taarsiisussanngortinneqarluni eqqartuussaanini eqqorsorinngimmagu suliassanngortitseqqiigami 1,3 millionit koruuniinnarnik taarsiisussanngortinneqarpoq.

Immap naqqatigut kabelip aserorneranik pissuteqartumik Sisimiut Upernaviullu akornanni internettimut attaveqaatit kipisaqattaartut, siusinnerusukkut aamma oqaluttuaraarput.

Internettimut attaveqaatit kipisaqattaarnerat sakkortusaavikkoortuunerannik pissuteqarpoq.

Isortaq Trawlip pisortaa, Sofie Sandgreen, Nunatta Eqqqartuussisuuneqarfiani eqqartuussisoqareernerani oqaloqatigiumagaluarparput, taannali peqataajumanngilaq.

- Nunatta Eqqartuussisuuneqarfia aalajangereerpoq, suliaq aamma isumannaarpoq, taanna oqarpoq.

8,2 millionit koruunit aningaasarpassuupput, Tusassimut taarsiissutigereerpisigit?

- Taarseereerpugut, suliaq aamma isumannaareerpoq, taanna uteqqiivoq.

Pisortaq allamik oqaaseqaqqinngilaq.

Suliani taamaattuni kisiartaaqqajanngitsoq

Sisimiut kujataanni immap naqqatigut kabeli kabelit 2019-p naalernerani qaammatit pingasut ingerlanerinnaanni aqqutalugineqartut katillutik pingasunut ilaavoq. kabelimmi allat marluk Sisimiut avannaata aamma Qaqortup Nuullu akornanni immap naqqaniittuusut aamma aqqutalugineqarpoq.

Tusassip kabelit taakkua pingasut aaqqissornerannut akisussaasuusup aningaasartuutai katillutik 71,6 millionit koruuniupput.

Tusassili tassa Isortaq Trawlimit 9,7 millionit koruuninik taarsiivigineqassasoq, Nunatta Eqqartuussisuuneqarfiani aalajangerneqarpoq.