Nuuk aamma takornariarfigissallugu soqutiginarpoq

Nunatsinni sumiiffinnut allanut naleqqiullugu Nuuk aamma takornariarfigissallugu soqutiginartuuvoq. Taama isumaqarput, Nunatsinni illoqarfiit pingaarnersaata takornarissanit soqutigineqarnerulernissaa orningarneqarnerulernissaalu pillugit suleqatigiissitaq, 'Colorful Nuuk'.
juunip 02-at 2015 13:27

 

Takornariaqarneq pillugu isumalioqatigiissitap, Visit Greenlandip taamatullu Sermersooq Business Councilip, Nuup eqqaatalu takornariarfigineqarnerunissaanik suliniuttaat, Kommuneqarfik Sermersuup borgmesteriata, Asii Chemnitz Narupip tapersersorlugu oqarpoq.

 

- Nuup qallunaaqarfittut isiginiarneqartarnerani allaanngilaq Nuummiuusugut taqiallalluta pisimasugut. Tamanna pissusissamisuunngilaq tassami Nuuk tassaavoq Nunatsinni illoqarfiit inuttunersaat illoqarfiillu pingaarenrsaat. Soorunami takornarissanut tunniussassanik ulikkaarpugut.

 

Kommuneqarfik Sermersuumi borgmesteri, Asii Chemnitz Narup taama oqarpoq, Nuullu taassumalu eqqaa takutitassaqarluartoq aamma oqaatigalugu.

 

Nuummi innuttaasut illoqarfitsik pillugu pitsaasunik soqutiginartunillu sunik takutitassaqarnersoq, inuit nittartakkatigut attaveqarfiisigut assilisanik oqaluttuanillu Nuummiut juuni tamaat periarfissinneqarput saqqummiussinissaminnik, tamanna takornariaqarneq pillugu isumalioqatigiissitamit, Visit Greenlandimit sulissutigineqarluni.

 

Suleqatigiissitaq 'Colorful Nuuk' siorna pilersinneqarpoq Sermersooq Business Councilimit Visit Greenlandimillu. Tassalu tamanna maanna inerisarneqaleruttorluni.

 

Suliniut tamanna aallartimmalli Nuummi innuttaasut peqataatinneqarnissaat siunertaavoq. Tamassumalu pitsaanerusumik anguneqarnissaa pillugu Nuummi innuttaasut assilisaminnik, inuit nittartakkatigut attaveqaataannut ilanngussinissaat kaammattuutaalluni. Assit illoqarfissuup Nuup sunik takutitaqarsinnaaneranik oqaluttuartuussapput. Nuummiullu assinik nittartakkamut ilanngussisut makitsinikkut arlalinnik akissarsiaqartinneqartussaapput. Assinik nassiussisoqarsinnaavoq juunip naanissaa ilanngullugu.

 

- Siunertarput tassaavoq, Nuup tamatigoortuuneranik takutitsinissaq - illorsuit portusuut betonimik sanaat pivallaanngikkaluarlugit kisiannili aamma Nuup allaanerussutaasa takusassiarineqarnissaat pingaaruteqarpoq. Nuup innuttaasa inussiarnersuuneri amerlaarsuunerilu takutinneqarnissaat pingaaruteqarpoq.

 

Visit Greenlandip pisortaa, Anders Stenbakken oqarpoq.

 

Nuuk aamma Kalaallit Nunaata ilaattut kusanartutut takutinneqarnissaa suliniutip aamma siunertarissagaa, borgemesteri, Asii Chemnitz Narup oqarpoq.

 

- Nuuk Kalaallit Nunaannut peqataalluinnartuuvoq. Inuit 17.000-it Nuummi innuttaapput. Ilaat qangatut inooriaaseqarput aalisarnermik piniarnermillu inuuniuteqarlutik allat muteerniusumik inooriaaseqarput atorfeqartuullutik, kulturilerisuullutik namminersortuullutillu. Taamaattumik illoqarfitta assigiinngissitaartuunera imminermini nukiullunilu nuannaarutissaavoq.

 

Kommuneqaarfik Sermersuup borgmesteria, Asii Chemnitz Narup taama naggasiivoq (oqarpoq).

 

Nuuk pillugu assinik ilanngussaqarniaruit, tamanna qanoq pisinnaasoq, Visit Greenlandip nittartagaani atuarneqarsinnaavoq.

Live Blog ColourfulNuuk