Nutsat, atisat, inuunermillu isiginnittaaseq nutaaq
- Assera angisuunngorlugu takugakku tulluusimaarnaqaaq, Hendereraq Lynge KNR-mut oqarpoq.
Hendereraq Lynge inuiaqatigiinni inuuniarnikkut ajornartorsiuteqartutut inissisimasut aqqaniliusunut isikkumikkut allanngorsartittunut akuuvoq, tassani allanngorsartinnginnerminni allanngorsartereernermilu Dida G. Heilmannimit assilisaarneqarput. Assilisaartittussat nujaat umiilu killorneqarput, nutaanillu atisartaartinneqarlutik. Assit oktobarip aqqarngani Katuami "Homeless Makeover"-imik taasamik saqqummersinneqarput.
Hendereraq Lynge siuainaartumik soraarnerussutisiaqartuuvoq angerlarsimaffeqanngitsuullunilu.
Ukiut pingasut matuma siorna assiliseqattaarumaneqarami nangaariarnaniluunniit ilaarusulluni oqaatigaa.
- Misigisaq ullut tamaasa misigineq ajoratsigu, tassami uanga ukiumut immaqa ataasiaannaq isikkorittarpunga taamaammat nuannersorujussuuvoq peqataanera, Hendereraq Lynge oqarpoq.
Inuuniarnikkut ajornartorsiutillit assitigut oqariartuuteqarput
Dida G. Heilmannip inuuniarnermikkut ajornartorsiutillit angerlarsimaffeqanngitsullu aatsaat sammisarilinngilai, tassami perorsaanilerinermi ilisimatusarnermini taakkorpiaat pillugit inaarutaasumik 2021-mi allaaserinnippoq.
- Saqqummersitsinerma tunngavia unaaneruvoq angerlarsimaffeqanngitsut inuiaqatigiinnilu ilungersuuteqartut periarfissikkusullugit allatulaaq takuneqarnissaq tusaaneqarnissaq paasineqarnissarlu, taakkuami oqaasissaqaqaat tusarnaarneqarnissaallu pissusissamisoorpoq, Dida G. Heilmann oqarpoq.
Taamaammat assit saqqummersitat inuiaqatigiinni oqallitsitseqataassasut, inuiaqatigiinnilu angerlarsimaffeqanngitsunut inuuniarnermikkullu ajornartorsiuteqartunut ilisimasaqarnerulernissarput neriuutigalugu oqaatigaa, politikeriniillu isiginiarneqarnerulissasut aamma neriuutigalugu.
Silarlikkut allanngorsartinneq ilorlikkut aamma sunniivoq
Naak silarlikkut allanngorsartinneq sammisami ukkatarineqaraluartoq qanilaarnermik aamma tunniussaqartuusoq Dida G. Heilmann oqaluttuarpoq, tassami allanngorsartinnerminni isumagineqarput, atisartaartinneqarput, nujalerisumiit isumagineqarlutik qulinneqarlutillu. Tamannalu qanilaarnermik tunniussisoq oqaluttuarpoq. Maannalu allanngorsartittut ilaat imminnut naleqartinnerulerput imminullu ajukkukkunnaarlutik.
- Allangorsartittut ilaat oqarpoq: Wow, taamatut isikkoqarsinnaavunga! Taannalu isikkuni pillugu ilinniaqqinnissaminut ajukkuttarnikuulluni allanngorsartereerami ilinniaqqinnissani pileritsaappaa, ajukkuttariaqarnanimi paasigamiuk, inuuninilu allanngortikkusulerlugu, Dida G. Heilmann oqarpoq.
Inissamik tunineqarnissani suli utaqqigaa
Hendereraq Lynge siusinaarluni soraarnerusutisiaqartuuvoq angerlarsimaffeqanngitsuullunilu. Maannalu qiterluttuugami kommunimut pitsorluttunut inissiani najugaqarnisssamik qinnuteqarnerminut uterfigineqarnissani utaqqiinnarpaa.
- Qitiluttuugama førtidspensionistinngornikuullungalu handicap boligmik qinnuteqarnikuuvunga, imaassinnaavoq qatangiinnartunga, imaassinnaavoq aqagu initaartunga imaassinnaavoq aatsaat toqoreeruma, ha ha ha, Hendereeraq Lynge illaatigaluni oqarpoq.
Assit, Dida G. Heilmannip saqqummersitai, novembarip aqqarngat ilanngullugu Katuami takusarneqarsinnaassapput.
