Nutaarsiassatsialak: Peqqissisoqarlunilu killilersuutinik qasukkaaneq

Misissortissimasut inernerinut tusarluarnartoqarpoq.

Amerlanerusunik tunillatsissimasoqanngilaq.

Inuit 826-t Nuummi misissorneqarput, misissorneqartullu taakku akornanni tunillatsittoqarsimanngilaq.

AAMMA ATUARUK Covid-19: Omkring 800 blev tirsdag testet i Nuuk

- Siullermik oqaatigissavara tulluusimaarama. Innersuuneqartunut inuit ilungersorlutik aallussimmata tulluusimaarutigaara, tamatta kivitseqataalluta akisussaassuseqarlutalu iliuuseqarsimagatta, Naalakkersuisut siulittaasuat Múte B. Egede oqarpoq.

- Innersuussutit malissimagatsigit ilorraap tungaanut ingerlavugut.

Taamaattumillu killilersuinerit Naalakkersuisunit qasukkarneqarput.

Akiuussusersimanissamut piumasaqaat sivikillisinneqartoq

Nunatta iluani angalasut tamarmik tamakkiisumik akiuussuserneqareersimanissaat juulip naanerata tungaanut piumasaqaataagaluarpoq. Akiuussuserneqanngitsut tamarmik tamanut ammasumik angallatinut ilaaqqusaanngillat.

Tamanna qasukkarneqarpoq. Tallimanngorneq juulip 23-ata tungaanut tamanna taamaallaat atuutissaaq.

Kikkut tamarmik iserfigisartagaanni qanikkut assiaquteqarnissaq inunnillu 20-nit amerlanerunngitsunik katerisimasussaatitaannginneq tallimanngorneq juulip naggataanut atuuppoq.

AAMMA ATUARUK Nuna tamakkerlugu angalassagaanni akiuussuserneqarsimasariaqartoq

Akiuussuserneqarsimanermut uppernarsaammik pissarsissaguit innuttaasut sullissivianut Suillissivik.gl-mut qinnutigisinnaavat, Naalakkersuisut siulittaasuat Múte B. Egede oqarpoq.

- Attaveqaatit mobiilillu arlalinnit atorneqannginnerat ilisimavarput. Nalunngisaqaruit app-inut qinnuteqaatinulluunniit ikiortariaqartunik ikiuissasutit innersuussutigisinnaavarput, Múte B. Egede oqarpoq.

Peqqinnissaqarfimmi Corona-hotlinelluunniit tamakkuninnga ikiuisinnaangillat. Oqarasuaatikkummi saaffissat ulapipput, taama nassuiaateqarput.

Akiuussuserneqarsimanissamut piumasaqaat Naalakkersuisunit ersersaarusupput:

Nunatta iluani angalaneq: Innuttaasut angerlarsimannginertik pissutigalugu kapitissimanngitsut angerlassatillugit kapitissimanissamut piumasaqaat atuutinngilaq. Tassaasinnaapput inuit sulinngiffeqarlutik angalasut. 

Inuit, nunatsinni angalasimallutik angerlamut angalasut, tikikkunik angerlarsimaannarallartariaqanngillat.

Danmarkimiit tikittussat: Aappassaanilli akiuussuserneqarsimanani nunatta avataaniit tikikkaanni, ulluni tallimani angerlarsimaannarallarnissaq piumasaqaataavoq. Angerlarsimaanaqqusaaneq atorunnaasappat coronamik misissortinnermi tunillatsissimannginnermik peqartoqassaaq.

Suliniutit nutaat: Naartusut milutsitsisullu akiuussuserneqarnissamut neqeroorfigitittut

Nuummi inuusuttut 16-nik 17-nik ukiullit akiuussuserneqarnissaanut tallimanngorpat neqeroorfigitissapput.

Nunatsinni qaammatit sisamassaat naartusut milutitsisullu akiuussuserneqarnissaanut neqeroorfigineqarnerat nutaarsiassaavoq. Tamanna Danmarkimi Sundhedsstyrelsip nalunaarutigigereeraalu pivoq.

Nunatta nakorsaaneqarfiata nittartagaanni tunillatsissimasut ikilisimasut aamma allaqqavoq.

Nunatsinni suli tunillatsissimasut 25-upput. Tunillatsiisimasut 30-sut nittartakkami ippassaq marlunngornermi allaqqavoq.

Peqqisseqqittut arlaqarput, Nunatta nakorsaaneqarfianeersoq Paneeraq Noahsen oqarpoq.

Sisimiunili ataatsimik tunillatsittoqarsimavoq.

- Aatsaannguaq Sisimiuninngaaniit sianerfigitippugut, tikinnerminiit ullup tallimassaani misissortinnermini coronaviruseqarluni paasisimavaa. Tikinnerminiilli mattusimasimammat tunillaasimanissaanut aarlerinaateqanngilaq, nakorsaq Paneeraq Noahsen oqarpoq.