Covid-19: Nuummi 800-it marlunngornermi misissortittut
Nunatsinni inuit Covid-19-imik tunillanneqarsimasut aatsaat taama amerlatigalutik 30-iusut, taakkunannga aqqaneq marluk Nuummi, ippassaq paasinarsivoq.
Taamaammat Naalakkersuisut Kommuneqarfik Sermersooq suleqatigalugu tunillanneqarsimasinnaasunik Nuummi misissuileruttorput.
Missisortikkumasullumi amerlasut, Namminersorlutik Oqartussat Covid-19-imut akiuussusersuinermi ataqatigiissaarisuat, Anna Wangenheim oqarpoq.
AAMMA ATUARUK Nuummi misissuivik ammanerusalerpoq: Nalunaaqutaq 8.30-imit misissortittoqarsinnaavoq
- Tassa sulisoqarpoq. Annertuumik misissuisoqarpoq. Nuummiinnaq ippassaq takuarput, 800-it missaanniittut misissortittut, sulilu aamma ulluni tulliuttuni amerlasuut misissorneqassallutik.
Nuummi inuit hunnorujukkuutaat covid19-imik tunillanneqarsimasinnaanermik misissorneqarnissamut ataasinngormat siuleriiaateqqapput.
Amerlasuulli misissortinnatilluunniit angerlaannartariaqarput. Amerlanerusunummi misissuinissamut atortorissaaaruteqanngilaq.
Aatsaat taama amerlatigisut misissortikkiartortut
Misissuivik misissuinerit nalunaaquttap akunneranut 45 peqqinnissaqarfiup nakorsianut nalunaarsuivianut ataasinngormat nalunaarsorsinnaavai. Ulloq taanna tikillugu qarasaasiat marluk misissuivimmi atorneqarput.
Qarasaasialli marlunnik ilaneqarput, taavalu aamma misissuivik ataatsimik ilaneqaqqimmat, inuit misissorsinnaasat nalunaaquttap akunnerani 100-nngortut marloriaatinngortut, Kommuneqarfik Sermersuumi ataatsimoorussanut sullissiviummut pisortaq, Gerth Jakobsen ippassaq marlunngornermi nassuiaavoq.
AAMMA ATUARUK Nuummi inuusuttut: 16-inik 17-inillu ukiullit tallimanngorpat akiuussuserneqarsinnaalersut
Pisullumi pisortat ilinniarfigigaat, Namminersorlutik Oqartussat akiuussusersuinermi ataqatigiissaarisuat oqarpoq.
- Eqqaamassavarput siornatigut inuit taama amerlatigisut ataatsikkorsuaq misissornikuunnginnatsigit. Taamaammat aamma ukua pisut misilittakkatigut ilinniarfigissavagut, Anna Wangenheim oqarpoq.
