Nittartagaq: Danskit tarnip pissusiinik ilisimasallit meeqqanik allamut inissiinissamut misissueriaasiat isornartoq

Apeqqut paasilluarpiuk? Aamma danskisut eqqortumik akilertorsinnaaviuk?

Tassa Danmarkimi kommunini tarnip pissusiinik ilisimasalittut atorfillit meeqqanik allamut inissiinissamut naliliiniarnerminni angajoqqaanut apeqqutigisartagaasa ilaat. Aamma ilaqutariinnut kalaallinut Danmarkimiilersimasunut apeqqutigisaraat, nutaarsiassaqartitsivik dr.dk allappoq.

Tamanna peqatigiiffik Mentor Immanuelip isornartorsiungaatsiapaa. Peqatigiiffik taanna ilaqutariinnut kalaallinut allamut inissiinissamut suliani ikiuuttarpoq.

Tamannami angajoqqaanik kalaallinik nalilersuinerlunnermik kinguneqarsinnaasoq, Najannguaq Dalgård Christensen Mentor Immanuelimeersoq DR P1 Morgenimut oqarpoq.

- Danskimmi Kalaallit Nunaanniilersimasut kalaallit ileqqui naleqartitaallu tunngavigalugit kalaallisut apersorneqaraluarunik iluarinavianngilaat. Taamaaliortoqaraluarpammi misissuinerit allatorluinnaq inerneqassapput, taanna oqarpoq.

Silassorissutsimik misissuineq

Angajoqqaat kalaallit silassorissusaat qitornamik isumaginnissinnaassusaannik naliliinermi aamma misissorneqartarpoq.

Silassorissutsimik misissueriaaseq taanna Europami pissutsit aallaavigalugit USA-mi ineriartortitaavoq. Nunanilu allani, soorlu Kalaallit Nunaanni, kiinarsornermik ussersornermillu ileqqoqarfioqisumi, attaveqatigeriaatsit misissueriaatsimi tassani eqqumaffigineqartanngillat.

- Misissuinerit ilaat oqaasiuteqassusermut tunngalluinnarput. Danskillu oqaasii misissueriaatsimi tassani atorneqarput. Misissuinernilu apersukkat ilitsoqqussaralugit oqaasii atornagit tapertaralugilli oqaasii atorneqaraangata angusassatigut artukkerneqartartut ilisimatusarluni misissuinerni erserpoq, Rigshospitalimi ilisimatusartuuneq Rune Nielsen DR-imut oqarpoq.

Nalunaarusiaq sapaatit akunnerata tulliani saqqummissasoq

Mentor Immanuelimiit oqarnerat naapertorlugu, Danmarkimi kalaallinik meeraqarpoq angajoqqaavinik nalilersuinerlunnermik aallaveqartumik allamut inissinneqarsimasunik.  

Danmarkimi atugarissaarneq pillugu ilisimatusarfiup, VIVE-p, Danmarkimi meeqqat kalaallit allamut inissinneqarsimasut pillugit sulianik nalunaarusiaa utaqqiluuligaq sapaatit akunnerata tulliani saqqummissaaq.

Folketingip tamanna pingasunngornermi maajip 25-anni tusarniaassutigissavaa.