Nutaarmiuni atuartut ilinniartitsisoqanngillat

Atuartut ilinniartitsisumit imaluunniit timelæreremit piffissami qaninnermi atuartinneqarnissaat ilimagineqanngilaq. 

Atuartut angajoqqaaminnit atuartinneqarput, Upernavimmi nunaqarfiinilu atuarfiini pisortaq Karoline Rosing oqarpoq.

- Nutaarmiuni atuarfimmi timelærereq oktoberip 24-ani aallarmalli atuartut atuarfimmi atuartinneqanngillat, maannakkut atuartut sisamaasut angajoqqaaminnit atuartinneqarput, Atuarfimmi pisortaq, Karoline Rosing, taama naliliivoq.

Nutaarmiut 37-nik innuttaqarpoq taakkunanngalu meeqqat sisamat atuartuullutik. Ilinniartitsisunik Nutaarmiunut nuukkusuttunik pissarsiniartarnerat ajornartorsiutaasartoq, nunaqarfimmi aqutsisut siulittaasuat, Simon Sakkariassen, radioaviisimut ippassaq oqarpoq. Nutaarmiuni ilinniartitsisumik timelærerimilluuniiit pissarsiortoqartoq, Karoline Rosing oqarpoq.

- Meeqqat atuartinneqarnerat unittussanngimmat timelærerinik ilinniartitsisuniluunniit pissarsiniarluta misissuiuvugut, Karoline Rosing oqarpoq.

Aamma atuaruk William Kriegel: Meeqqat pisinnaatitaaffii innarlerneqartarput

Meeqqat pillugit Siunnersuisoqatigiivisa illersuisuata, William Kriegelip, Inatsisartunut qineqqusaarnermi politikerinut oqariartuutigaa nunaqarfiit ilaanni tamakkiisumik atuartitsisoqanngimmat naak Naalagaaffiit Peqatigiit Meeqqat pillugit Isumaqatigiissutaani meeqqat atuartinneqarnissaannut Kalaallit Nunaat atsioqataanikuusoq. Meeqqat illersuisuata isornartorsiuteqarnera Karoline Rosingip paasisinnaanerarpaa. 

- Tupinnanngilaq Meeqqat Illersuisuat taama oqarmat, pissutigalugu kommuunit aggulunneranni sipaarniartoqarnerani atuarfik eqqugaanikuummat. Sipaarniarneq aqqutigalugu atuartitsissutigineqartussat tamakkiisumik atuartitsissutigineqarneq ajorput, ingammik nunaqarfinni mikisuni ikittunik atuartoqartuni, Karoline Rosing oqarpoq, nangillunilu: atuartitsissutigineqartussat fagit tamaasa inuup ataatsip atuartitsissutigisinnaanngilai.

Naalagaaffiit Peqatigiiit Meeqqat pillugit Isumaqatigiissutaannut naapertuutinngilluinnarpoq politikerit atuarfeqarfiit sipaarniarfigisarmatigit.