Naligiissitaanerup ullua: Nutaamik naligiissitaanermut immikkoortitsinnginnissamullu inatsiseqalissaaq
Nunatsinni naligiissitaanermut inatsit pisoqalivallaarpoq sukaterneqartariaqalerporlu.
Ullumi maajip 20-iani naligiissitaanerup ulluanut atatillugu, taama oqarpoq, Aningaasaqarnermut Naligiissitaanermullu Naalakkersuisoq Naaja Nathanielsen (IA).
Taamaammat nutaamik naligiissitaanermut immikkoortitsinnginnissamillu inatsisissamik maanna Naalakkersuisut suliaqarput, taannalu ataasikuttatut suliaassaaq innuttaasut qanoq piginnaatitaaffeqarneranik imaqartussaq.
- Ullumikkut nunatsinni immikkoortitsisoqaqqusaanngilaq, inatsilli ersarippallaanngilaq qanoq pisinnaatitaaffeqarnissamut tunngatillugu. Taakku kattutissavagut taamaalillugit qanoq pisinnaatitaaffeqarnermut ersarinnerulersillugit, inuppassuimmi arlalikkuutaat matumani pineqarput, Naaja H, Nathanielsen oqarpoq.
Immikkoortitsinnginnissamut inatsit taamaallaat suiaassutsimut tunngatillugu immikkoortitsisoqannginnissaanut tunngaannanngilaq, aammali allamiuluannginnissamut, kinguaassiutinut tunngatillugu, upperisanut innarluuteqarnermulluunniit aamma tunngasinnaavoq.
Maalaaruteqartarfik
Immikkoortitsisoqannginnissaa pillugu inatsisiliortoqaannanngilaq,aammali naalakkersuisut maalaartarfimmik pitsaaanerulersitserusupput, soorlu immikkoortinneqarsimaguit imaluunniit kinguaassiutitigut innimiilliorfigineqarsimaguit piuminarnerusumik maalaarsinnaanngussaatit.
Naaja H. Nathanielsen naapertorlugu, maalaartarfiliornissaq aallarnisarneqarpoq.
- Suliassat ersarinnilerulissasut neriuppugut, innimiilliornernut immikkoortitsinernullu tunngatillugu suliassat unammillernarnerulissaqqooqaat, Naaja Nathanielsen oqarpoq.
Siunnersuisoqatigiit tikilluaqqusipput
Naligiissitaanissamut siunnersuisoqatigiit naalakkersuisut siunnersuutaat iluarisimaarpaat.
- Qujaruppagut. Naalakkersuisut iliuusaat ajunngilluinnarpoq, suiaaqatigiit kisiisa pinnagit aammali siammasinnerusumik isiginnillutik immikkoortitsinernut tunngasut inatsimmi ersarissarneqartussanngormata iluarluinnarpoq, Britta Keldsen naligiissitaanissamut siunnersuisoqatigiinni siulittaasuugallartoq KNR-mut oqarpoq.
Britta Keldsen aammattaaq oqarpoq eqqarsarnartoqartikkini, taassuma inatsisiinnaalluunniit nunatsinni aaqqissuussaaneq allanngortissinnaagaa:
- Inatsit atuutilerpat, arlalitsigut aaqqiisoqassaaq, inatsimmi immini ersersitsivoq aaqqiissuteqarluassaqqaartoq. Inuiaqatigiinni inooqataasutut aammalu naligiissitaasoqassappat iluarsisarialinnut iluarseeqataasariaqarpugut, taanna oqarpoq.
Naligiissitaaneq sorpassuarnik imaqarpoq
Arnat taakku marluk naapertorlugit, inuiaqatigiinni equngassutit aaqqinneqassappata sukkut equngasoqarnersoq eqqumasoqartariaqarpoq, assersuutigalugu Kalaallit Nunaanni naligiissitaanermut ulloqartitsinikkut.
- Ullup matuma siammasissuunera ersersissavarput. Suiaassutsit kisiisa pinnagit, kisianni naligiissitaaneq tamanut isiginninnermiit isigalugu, Naaja H. Nathanielsen oqarpoq tikkuarpaalu nunatsinni suliffeqarfinni suli angutit arnallu immikkoortinneqarpallaartartut, soorlu ileqqut malillugit angutit suliassaattut isigisat angutinut arnallu suliassaattut isigisat arnanut, taanna oqarpoq.
Britta Keldsenili naapertorlugu, inuiaqatigiit iluanni naligiissitaaneq taamaallaat suliffeqarfinnuinnaq tunngatinneqassanngilaq.
- Isumaqarpunga inuiaqatigiit tamakkiisumik isigineqartariaqartut, takusariaqarpagut ilaqutariit iluanni qanoq ileqqoqartoqarnersoq, atuarfinni, paaqqinnittarfinnilu taavalu angutit arnallu qanoq pineqarnerat tassuunakkut takussavarput, suummi tamarmik imminnut ataqatigiipput, Britta Keldsen oqarpoq.
Naligiissitaanerup ulluanut atatillugu, naligiissitaanermut siunnersuisoqatigiinni ilaasortat nunatsinni innuttaasunik apersuisimapput taakkununnga naligiissitaaneq qanoq isumaqarnersoq, aperineqartullu akissutaat naligiissitaanermut siunnersuisoqatigiit qarasaasiakkut inuit naapittarfiani quppernerannut ikkunneqartarput.
