Naligiissitaanermut Siunnersuisoqatigiit: Siuariartorpoq, sulili unammilligassaqaqaagut
Nunatsinni naligiissitaaneq ukiut kingulliut ingerlaneranni pingaartinneqarnerulerpoq.
Naligiissitaanermut Siunnersuisoqatigiit siulttaasuat Kathrine Bødker Arnat Ulluanni taama oqarpoq:
- Akuersissuteqarnermut inatsiseqalernissaanut siunnersuut naalakkersuisut maanna sulissutigileruttorpaat. Naligiissitaanermut Siunnersuisoqatigiinni ukiuni arlalinni sulissutigisatta politikerinit sulissutigineqaleriartornerat nuannaarutissaavoq, Naligiissitaanermut Siunnersuisoqatigiit siulittaasuat Kathrine Bødker KNR-imut oqarpoq.
Taassuma Naligiissitaanermut naalakkersuisup, Naaja Nathanielsenip (IA) akuersissuteqarnermut inatsit allanngortinneqarnissaanik, tassa illuatungeriit tamarmik akuersissuteqarsimanngikkunik atornerluisoqarsimaneranik oqarsinnaalernissamik sulissuteqarniarluni nalunaarutigisimagaa innersuussutigaa.
Inatsit ullumikkutut itsillugu nakuusernikkut nakuusernissamilluunniit siorasaaruteqarnikkut atoqatiginnittoqaraangat imaluunniit pinerluffigineqartoq nikeriarsinnaajunnaarsinneqarsimappat tamanna atornerluinertut aatsaat taaneqarsinnaavoq
Kissaatigineqartoq: Atornerluinerup oqallisigineqarnissaa
- Siullertut atornerluinerit pinasaartinneqarnissaat pillugu inatsit taanna pisariaqartipparput. Aammattaaq atornerluineq suunersoq pillugu oqallinnissaq pisariaqartipparput. Inuusuttorpassuit angutit arnallu atornerluinerup suunera iluamik ilisimanngikkaat ilimagaara, Kathrine Bødker oqarpoq, nangillunilu:
- Arnarpassuit nammineq ilisimanngisaminik atornerlunneqarsimasut ilimagaara. Taakkuli inuunerminnik innarliisumik tarnikkullu ikiliisumik nalaataqarnikuupput. Inuiaqatigiinni oqallinnermik pilersitsinissaq pillugu inatsit pisariaqartipparput, aamma inuusuttut angutillu qassinilluunniit ukioqaraluartut pissusilersuutigisatik innarliisut eqqarsaatigisinnaalissavaat.
Angutit peqataalersut
Kannguttaatsuliorneq pillugu tamat oqallittarnerat ilorraap tungaanut ingerlalereersoq, Kathrine Bødker isumaqarpoq. Suliat angisuut tusagassiuutitigullu oqallisaangaatsiartut iluaqutaalluarput. Suliat taakku Siumumi KNI-milu innimiilliornikkut kannguttaatsuliornermut tunngapput. Suliaq Siumumut tunngasumi Mikael Petersen kinguaassiutitigut kannguttaatsuliorsimasutut piumasaqaatitaqanngitsumik ulluni 40-ni pineqaatissinneqarsimasunut inissiisarfimmiittussanngortinneqarpoq.
Suliami, KNI-mut tunngassuteqartumi pisortaasimasoq, Peter Grønvold sulisunit tallimanit kannguttaatsuliorsimasutut unnerluutigineqarpoq. Suliaq taanna marsip ulluisa 24-anni eqqartuussivimmi aalajangiiffigineqassaaq.
AAMMA ATUARUK KNI-mi pisortaaneq nutaaq: Ingerlatsivimmi ulluinnarni malittarisassat erseqqissut nutaat
- Angutit suliffeqarfinni innimiilliortoqartarneranik nalunaarutiginnittalernerat maluginiakkama ilagaat, Kathrine Bødker oqarpoq, nangillunilu:
- Angutit amerlanerusut naaggaarsinnaalernissaat pisariaqartipparput, aamma angutit amerlanerusut naligiinnerusumik oqaluuserinnittalernissaat pisariaqartipparput.
Pingaartumik arnanut nakuusertarneq nunatsinni arnat pisinnaatitaaffiinut tunngatillugu allannguisoqartariaqavissorviusoq, Kathrine Bødker isumaqarpoq:
- Arnat amerlavallaat aappariinnermi nakuuserniartoqartarnera misigisarpaat, arnallu kisimik eqqorneqarneq ajorput. Inuiaqatigiinni assigiinngitsumik eqquivoq. Meeqqat sunnerneqartarput, suliffeqarfiit sunnerneqartarput. Ajornartorsiutaavoq amerlasuunit malugineqartoq.