Inatsit allanngortinneqassasoq: Naalakkersuisup kinguaassiutitigut innimiilliortoqartarnera piuneerutsinniaraa
![](/sites/default/files/styles/image_934x467/public/article_images/7v9a6116.jpg?itok=sd9q-dpc)
Kinguaassiutitigut innimiilliornerit assersuutigalugu suliffeqarfinni pisut sakkortunerusumik pineqartassapput.
Naligiissitaanermut naalakkersuisoq, Naaja Nathanielsen (IA) taama isumaqarpoq.
Taamaammat inatsisip allanngortinneqarnissaa sulissutigaa.
- Paragraffit annikitsut aaqqiiviginerat naammanngilaq. Naligiissitaanermut inatsip atuutilerneqarneraniillu pisoqarnikuungaarmat inatsisit iluarsaatingaatsiarneqarnissaa pisariaqarpoq, naalakkersuisoq oqarpoq, inatsillu kannguttaatsuliornermik iliuuseqartoqarneranut tunngatillugu erseqqissarneqassasoq nassuiaatigalugu.
- Tamatuma saniatigut inatsit immaqa sukateriffigissavarput, kinguaassiutitigut innimiilliornerit taamaalillutik akiliuteqarfiuinnarunnaarlutik akiliisitsissutaasalissallutik. Pinerluttulerinermik inatsit aamma misissussavarput suullu inatsisinik akerliunerit sinaakkusersornerat annertusissallutigu.
Innimiilliornerulluinnartoq
Nunatsinni Naligiissitaanissamut Siunnersuisoqatigiit kinguaassiutitigut innimiilliornerit sakkortugaangata maanna eqqartuussivitsigoortinneqarsinnaasut pillugit sulianut politikkikkut iliuuseqartoqarnissaanik kissaateqarnerata kingunerisaanik taama nalunaaruteqarpoq.
- Inatsisini naapertuuttoqanngilaq. Nikanarsaalluni tiingaffiginninneq eqqartuussivilersuunneqarsinnaanngussaguni ima ingasatsigisariaqarpoq; kannguttaatsuliornerulluni, kinguuassiutitigut killissanik qaangiinerulluni imaluunniit pinngitsaaliinerulluni, naligiissitaanermut siunnersuisoqatigiit siulittaasuat, Kathrine Bødker KNR-imut oqarpoq.
Nikanarsaalluni tiinganiartarnerup naassuiaataa:
Angutit arnallu naligiissitaanissaat pillugu Inatsisartut inatsisaat nr. 3, 29. november 2013-meersoq ima nassuiaatigineqarpoq:
§4. Imm. 2. Inuk kinguaassiuutinut attuumassuteqartunik pissusilersuutinik piumassuserinngisaanik nalaataqartinneqaraangat, inuup pineqartup kanngunarsarnissaanik, nikanarsarnissaanik, assigiinngisinneqarnissaanik imaluunniit nukillaarsarnissaanik sunniuteqartumik siunertaqartumilluunniit, kinguaassiuutitigut peqqusiileqisitsisoqartarpoq.
Najoqqutaq: inatsisit.gl
Tassunga atatillugu eqqartuussiviup KNI-p pisortarisimasaata sulisunut arfinilinnut kannguttaatsuliorsimasutut sapaatip akunnerata siuliani aalajangiinera innersuussutigaa.
- Taanna suliaq nikanarsaalluni tiingaffiginninnertut unnerluutigineqartoq kannguttaatsuliornertut eqqartuussinertut naammassineqarpoq, Kathrine Bødker oqarpoq, nangillunilu:
- Nikanarsagaalluni tiingaffigineqarneq killissamik qaangiiffigineqarneruvoq - misigisaq kannguttaatsuliornerunngikkaluartoq, kinguaassititigulluunniit qaangiiffineqarnerunngikkaluartoq pinngitsaaliinerunngikkaluartorluunniit. Nikanarsaalluni tiinganiartut maani pineqaatissinneqarsinnaannginneri ajornartorsiuterujussuusoq isumaqarpunga.
Inuiaqatigiinnik ersersitsissasoq
Naaja Nathanielsenip (IA) naalakkersuisut naalakkersuisuunermi aallartinneranniilli inatsimmik allannguinissaq pilersaarutigisimagaat erseqqissaatigaa.
- Taamaalilluta inuiaqatigiinnik ersersitsisumik naligiissitaanermut inatseqassaagut, ullumikkut inuuvugut killissatullu isumaqarfigisagut ullumikkumut tulluartut qangali aamma atuussimasariaqaraluarput, taanna oqarpoq.
Naalakkersuisut inatsimmut allannguutissatut siunnersuut suliaralugu ukioq manna aallartissagaat paasissutissiissutigaa, taassumalu aappaagu imaluunniit 2024-p aallartinnerani saqqummiunneqarnissaa anguniagaavoq.