Naligiissitaanermik Siunnersortit: Kinguaassiuutitigut kannguttaatsuliornerit sakkukinnerusut aamma eqqartuussivinnut tunniunneqarsinnaasariaqarput
Nikanarsaalluni tiingaffiginninneq nunatsinni inerteqqutaavoq. Taamaaliornerli eqqartuussivilersuunneqarsinnaanngilaq.
Tamannalu ajornartorsiutaasoq Naligiissitaanissamut Siunnersuisoqatigiit tikkuarpaat.
- Inatsisini naapertuuttoqannginnera naligiissitaanissamut siunnersuisoqatigiinnit uparuartareernikuuarput. Nikanarsaalluni tiingaffiginninneq eqqartuussivilersuunneqarsinnaanngussaguni ima ingasatsigisariaqarpoq; kannguttaatsuliornerulluni, kinguuassiutitigut killissanik qaangiinerulluni imaluunniit pinngitsaaliinerulluni, Kathrine Bødker oqarpoq.
AAMMA ATUARUK Peter Grønvoldimit kannguttaatsuliorfigineqarsimasut: Ikinnerpaat inoqamminnik politiinut nalunaarutiginnikkusuttarput
Taanna Naligiissitaanissamut Siunnersuisoqatigiinni siulittaasuuvoq.
KNI-mi pisortaanerusimasumik eqqartuussineq sapaatit akunnerisa siuliani naammassineqartoq taassuma assersuutigaa. Pisortaanerusimasoq arnanik arfinillinik kannguttaatsuliorsimasutut eqqartuunneqarpoq.
- Taanna suliaq nikanarsaalluni tiingaffiginninnertut unnerluutigineqartoq kannguttaatsuliornertut eqqartuussinertut naammassineqarpoq, Kathrine Bødker oqarpoq.
Kannguttaatsuliornerilli "sakkukinnerusut" aamma eqqartuussivilersuunneqarsinnaasariaqartut taanna isumaqarpoq:
- Nikanarsagaalluni tiingaffigineqarneq killissamik qaangiiffigineqarneruvoq - misigisaq kannguttaatsuliornerunngikkaluartoq, kinguaassititigulluunniit qaangiiffineqarnerunngikkaluartoq pinngitsaaliinerunngikkaluartorluunniit. Nikanarsaalluni tiinganiartut maani pineqaatissinneqarsinnaannginneri ajornartorsiuterujussuusoq isumaqarpunga. Tassa kannguttaatsuliorfigineqarsimasariaqarneq aatsaat suliassanngortitsissagaanni.
AAMMA ATUARUK KNI-mi pisortaasimasoq kannguttaatsuliortutut eqqartuunneqartoq: Pineqaatissinneqarsimasunut inissiisarfimmiittussanngortoq
Nikanarsaalluni tiinganiarneq inatsisip suup unioqqutinneqarneranik takujuminaatsoq Naligiissitaanissamut Siunnersuisoqatigiit isumaqarput.
- Nikanarsaalluni tiinganiarnerup inerteqqutaanerani inatsimmi ersernerluppoq. Susassaqarfik nalinigiissitaanermut tunngasoq nunatsinni akisussaaffiulernikup, suliffeqarfimmilu atungassarititanut susassaqarfik suli nunatsinnit akisussaaffiulernikuunngitsup akornanni ataqatigiinnginnermit tunngaveqarsinnaavoq. Taakkualu marluk inatsisinik unioqqutitsinertut kinguneqartitsiffiusinnaanngillat, Naligiissitaanissamut Siunnersuisoqatigiinni siulittaasuusoq Kathrine Bødker oqarpoq.