Kuupik Kleist: Nutaamik naalakkersuisunngortitsinasuarnissaq pisariaqarpoq

Peter Olsenip kalaallisut oqaasilinnik tusagassiortussaaleqineq pillugu iliuuseqarnerata amigarnerarlugu isornartorsiorneqarnera naalakkersuisutut tunuarneranik kinguneqarpoq.

Naalakkersuisuuffilli taanna piaartumik inuttalerneqartariaqartoq, naalakkersuisut siulittaasuattut misilittagalik, Inuit Ataqatigiinneersoq, Kuupik Kleist oqarpoq.

- Uanga oqartussaasuuguma piaartumik inissiissagaluarpunga, suliassammi tassani annertungaatsiarput. Akisussaaffik arlalinnut agguaanneqarnissaa isumaqarpunga piviusorsiorpallaanngitsoq. Nassaartariaqarpoq, immikkut ittumik aggersaalluni elektroniskiusumik taasititsinikkut taamaaliorsinnaavoq. Taamaaliornikkut suliassat sivisuallaanngitsumik utaqqisinneqassaput.

Inatsisartut inatsisaat naapertorlugu naalakkersuisoq qinigaaffik naanngitsoq tunuarniuteqarpat, tamannalu inatsisartut ataatsimiinnerisa avataani pippat, naalakkersuisut siulittaasuat nutaamik naalakkersuisunngortitsinissaa pissutigu Inatsisartut aggersarneqarsinaaapput.

Peter Olsen Inatsisartut upernaakkut ataatsimiinnerata naammassinissaanut ulloq ataasiinnanngortoq naalakkersuisutut tunuarniuteqarpoq. Naalakkersuisutut tunuarniutaa inatsisartuni aamma suli suliarineqanngilaq, taamaammat taanna naalakkersuisutut suli ingerlagallarpoq.

Naalakkersuisumilli patajaatsumik atasinnaasumik naalakkersuisut siulitaasuat, Múte B. Egedep qinersinissaa siulittaasuusimasup pingaartutut isigaa.

- Naalakkersuisut siulittaasuanut pingaaruteqarpoq piffissap sinnerani atasinnaasumik toqqaanissaq, aammalu suleriaatsit eqqarsaatigalugit akerlilersorneqarnissaa ingalassimatinneqassasoq. tassa imaappoq inatsisartuni ilaasortat illuatungiliuttut pissutissaqassanngitsut tatiginnikkunnaarnermik taasititsisaqattaarnissamik, Kuupik Kleist oqarpoq.

Peter Olsen kalaallisut oqaasilinnik tusagassiortussaaleqineq pillugu oqallinnermi isorartorsoorneqarai peqqutigalugu tunuarniuteqartoqarpoq. Tusasssiortussaaleeqqinerli politikkikkut imaaliallaannaq aaqqinneqarsinnaanngitsoq, Kuupik Kleist isumaqarpoq.

- Uanga takusinnaavara tusagassiortunik kalaallinik, kalaallisut oqaasilinnik ikkussinissaq taannna immaqa naalakkersuinikkut aqqinneqarsinnaanissaa ilimanarpallaanngilaq.

- Kisianni isumaqatigiinniarnikkut aningaasarsiat eqqarsaatigalugit aamma atugassarititaasut eqqarsaatigalugit taamaaliortoqarsinnaassoq, ilimagisara naapertorlugu. Kisianni imaannanngitsupilussuussaaq, taanna oqarpoq.

Neriorsuinerlunnerit

Peter Olsenip suleqatigiissitamik KNR-ip siunissaanik aaqqiissutissatullu periarfissanik saqqummersitsisussamik pilersitsiniarluni 2022-mi juunimi neriorsuutigaa.

Suleqatigiissitarli suli pilersinneqanngilaq. Tamatumalu naalakkersuisup nutaap atuutilernerani attannissaa pingaaruteqartoq Oline Olsen erseqqissaavoq:

- Nutaamik naalakkersuisoqalerpat nangitsisoqarpat tamanna eqqaamassavarput. Naalakkersuisunngortussap ajornartorsiutaasunik ilungersuussilluni suliaqarnissaa pingaaruteqarpoq, taanna oqarpoq.

Inatsisartut ukiakkut ataatsimiinnerat septembarip 22-ani aallartissaaq.