Nunavummi inuusuttut imigassamik atornerluinermut akerliuinermut qaammatisiutiliortut
Imigassartorneq Nunavummi ajornartorsiutaavoq, naallu inuusuttut amerlanerpaartaat imerneq ajoraluartut, imigassartornerup ajornartorsiutaanera ulluinnarni inuunerannut sunniuteqarpoq.
Imigassap inuusuttut ulluinnarni inuunerannut sunniuteqarnerluttarmat titartagaliornissamik Imigassaq pillugu Nunavummi ataatsimiititaliarsuaq unammisitsivoq, qanoq ililluni akisussaassusilimmik imigassartortoqarsinnaanersoq pillugu unammisitsisoqarluni.
Inuusuttut titartagaat Nunavummi imigassartornerujussuup annikillisarniarlugu, Imigassaq pillugu Nunavummi ataatsimiititaliarsuup ukiumoortumik qaammatisiutaani assitaliunneqarput.
Haley Hackey: Imigassartaqanngitsumik unnussiuaaqatigiittoqarsinnaavoq
Haley Hachey, Nunavummi Qamanittuarmeersoq, unammisitsinermi ajugaavoq. Imigassartornani unnussiuaartoqarsinnaanera titartakkamini takutinniarsimallugit, taassuma Nunavut Newsimut oqaatigaa.
Imigassartorneq ajornartorsiutaasorujussuusoq, taanna oqarpoq, inuusuttullu angajoqqaami imernerujussuat pissutaalluni imigassartortalersartut, ajornartorsiutiminnit tassuuna qimaaniarsarisartut oqaatigalugu.
AAMMA ATUARUK Nunavummi nunaqarfiit arlallit juullikkunni ukiortaamilu imigassamut naaggaartut
- Inuusuttulli takuneq ajorpaat tamanna qanoq innarliitigisinnaanersoq, Haley oqarpoq.
Haleyp titartagaa qaammatisiutit saqqaani maanna atorneqarpoq. Inuusuttut naggueqatigiit Inunneersut aqqanillit allat aamma nersorniarneqarput, titartagaallu qaammatisiutini aamma takuneqarsinnaallutik.
Qaammatisiutit, inuusuttut titartagaannik imallit, Nunavummi atuarfinnut najugaqarfinnullu assigiinngitsunut nassiunneqarsimapput, soorlu aamma imigassanik pisiniarfinnut nassiunneqarsimasut.
Qaammatisiut pineqartoq nittartakkami uani takuneqarsinnaavoq.
