Nunavummi nunaqarfiit arlallit juullikkunni ukiortaamilu imigassamut naaggaartut
Nunaqarfinni sisamani Kangertugaapimmi, Sanirajammi, Kinngaanni Kimmerummilu imigassanik aalakoornartutalinnik Juullikkunni ukiutoqqamilu nioqquteqartoqarsinnaannginnissaa nunaqarfinni taakkunani innuttaasut ukiaq mannali aalajangerpaat.
Imigassat aalakoornartutallit Nunavummi nunaqarfinni tamani nalliuttuni inerteqqutaasariaqartut, imigassat pillugit Kangertugaapimmi ataatsimiititaliap siulittaasuata Patrick Palituup CBC News imut oqaatigaa.
Nunavummit Canadamilu sumiiffinnit allanit Kangertugaapimmut nunqarfinnullu allanut Juullikkunni tikeraartoqartartoq, Palituup aamma oqaatigaa:
- Tikeraartut tikilluaqqusaasutut misiginissaat kissaatigaarput, aalakuttullu ernummatigisariaqassanngikkaat isumaqarpugut, Patrick Palituq oqarpoq.
Sanirajammi ataatsimiititaliameersup Lauren Angugatsiaap CBC-mut assingusumik aamma oqarpoq:
- Nunaqarfitta nuannersuunissaat kissaatigaarput. Meeqqattalu toqqissisimanissaat kissaatigaarput, imigassallu aalakoornartut nalliuttuni taamaammat nioqqutaasannginnissaat kissaatigaarput, Lauren Angugatsiaq oqarpoq.
Kinngaanni ilaqutariit nalliuttuni isumannaatsuunissaat aamma anguniagaavoq, imigassallu tamanna pillugu nalliuttuni nioqqutaaneq ajorlutik. Lauren Angugatsiaq taama oqarpoq.
Nunavummi nunaqarfiit aqqaneq-marluk imigassanik nioqquteqarsinnaaneq namminneq aalajangiiffigisinnaavaat, nunaqarfinnilu arfinilinni imigassanik aalakoornartulinnik ukioq naallugu nioqquteqaqqusaanngilaq.
