Nunavummut aasaanera timmisartuussisarneq qinersisoqalerneratigut nalorninartorsiortinneqartoq
Air Greenlandip Nuup Iqaluillu akornanni siunissami aasaanerani angallassisarnissaa maanna aamma nalornissutaalerpoq, qinersisoqarnissaanik suaaruteqartoqarneratigut aalajangiisartut sapaatit-akunnerini tullerni arlalinni aalajangiisinnaassuseqassanngimmata.
Canadami nutaarsiassaqartitsivik CBC News taama oqaluttuarpoq, ilaatigullu Air Greenlandimeersoq Christian Keldsen issuaavigineqarpoq Kalaallit Nunaata Nunavullu akornanni timmisartuussisarnerup ingerlatiinnarnissaanut tapiissuteqartoqassanersoq pillugu Naalakkersuisut maanna utaqqimaarneqartut.
Christian Keldsenip CBC-Newsimut oqaatigaa pisortanit arlaatigut tapiissuteqartoqanngippat taamatut angallassisarneq aappaagu ingerlanneqassanngitsoq.
Nunavummi Nunatsinnilu naalakkersuisut angallassisarnerup ingerlatiinnarnissaanut tapersersuisinnaanissaat neriuutiginerarpaa, assersuutigalugu timmisartup ingerlaartarnerinut ilaassutitaanik pisinermikkut.
- Naalakkersuisuniilli sapaatit-akunnerini 5-6-ni maanna akissuteqarfigineqarnavianngilagut, aamma Nunavummi naalakkersuisunit ingerlaarfiup attatiinnarnissaa pillugu qanoq isumaqarnerannik suli tusagaqanngilagut Christian Keldsen CBC-Newsimut oqarpoq.