Nunavummi ministeri atorfimminit tunuartoq
- Paulimik ateqarpunga imerajuttuuvungalu. Oqaatsit taakkua imerajuttunit oqaatigineqartartut ilisimaneqarluarput.
Oqaatsit taakkua Paul Okaliup Nunavummi inatsisartut sisamanngormat ataatsimiinneranni atorfimminit tunuarnerminut oqalugiaatimini aallaqqaasiutigai. Nunavut naalakkersuisuini Paul Okalik peqqinnermut inatsiseqarnermullu ministeriusimavoq.
Paul Okalik inuusuttuunermini imigassamik ajornartorsiuteqarsimanerminik taavalu meeqqami inunngornerata kingorna imerunnaarsimanermik naalakkersuisuni suleqatiminut oqaluttuarami tupaallatsitsivoq.
Maannakkullu pissutsit taama inissisimaneranni ministeritut ingerlaannarsinnaanani, Paul Okaliup CBC NEWS-imut nassuiaatigaa.
Iqalunnilu imigassamik tuniniaasalissanersut, inuit ukioq kingulleq taasitinneqarmata, taasisut 77 procentiisa Iqalunni viinninut immiaaqqanullu pisiniarfeqalernissaa akueraat.
Nunavummi imminut toquttanerpassuit, persuttaanerpassuit, pinerluuteqartarnerpassuillu allat imigassartorsimanermut attuumatinneqartarput.
- Maanilu Nunavummi imigassamik ajornartorsiuteqartut imminnut aqussinnaalertinnissaannut ikiuinissatsinnut atortussaqartigata viinninik immiaaqanillu niueruteqartarnissarput tapersersorsinnaanngilara, taamaammat naalakkersuisutut tunuarpunga, Paul Okalik nassuiaavoq.