Nunavummi akiuussutissiisoqaleruttortoq
Nunavummiut Modernap akiuussutissaliai utaqqeqqaarpaat. Akiuussutissammi taakkua nillertorujussuarmiititassaasariaqaratillu assartoruminarnerummata uninngasuutigiuminarnerupput.
Akiuussutissat tikittut katillutik 6000-upput. Taakkunanngali 3000-iinnaat atorneqaqqaassapput, inummi ataaseq marloriarluni akiuussuserneqartussaammat akiuussutissat sinneri kingusinnerusukkut atornissaannut immikkoortinneqassagamik.
Iqaluinni utoqqaat illuanni najugallit siullertut akiuussuserneqassapput. Canadami ingammillu Nunavummi utoqqaat isumagiumallugit akiuussuserneqartussani salliunneqarnerpaasut, CBC allappoq.
Coronami Nunavummi maannamut tuniluuterujussuanngilaq. Tunillanneqarsimasut novembarimi decembarimilu 265-it missaanniipput, taakkualu ingammik Kangerlinimeersuullutillu Arvianneersuupput taavalu Hudsonip Kangerliumarngata sineriaani najugaqarfinneersuupput. Tuniluunnerli maanna pakkersimaarneqarpoq.
AAMMA ATUARUK Naggueqatigiit inuit Canadami akiuussutissamik kapitinnissamut salliutinneqassasut
Nunavummi inuit cooronamut attuumassutilimmik toqquteqartut katillutik maannamut tallimaapput. Taakkunannga sisamat Nunavup kujataani napparsimmavimmi uninngallutik toqupput, taakkunanngalu ataaseq arnaq inuusuttuuvoq Sanikiluamiit erniartortoq. Arnalli toqusup naalungiaa peqqillunilu ajunngilaq.
Arvianni, Eqaluttuutsiami, Igloolimmi Orsortuumilu sapaatit akunnerata tulliani akiuussutissiisoqassaaq. Nunavummi innuttaasut 75%-ii pilersaarutit malillugit marsip naanerani akiuussuserneqarsimassapput.
Nunavummi innuttaasut Montrealimiunut angerlarsimaannaqqusaasussanngulerunartunut sanilliullutik coronamik eqqugaarujussuarsimannginnertik usorsisimaarutigisinnaavaat.
