Naggueqatigiit inuit Canadami akiuussutissamik kapitinnissamut salliutinneqassasut
Canadami oqartussat inuiaqatigiinni eqimattat sisamat coronavirusimut akiuussummik siulliullutik pissarsisussat aalajangerpaat, CBC News allappoq.
Peqqinnissaqarfinni sulisut, utoqqaat angerlarsimaffiini sulisut, 80-it sinnerlugit ukiullit nunallu inoqqaavi.
Nunap inoqqaavini pingaartumik nunaqarfinni inunnullu immikkut nunaliussani peqqinnissaqarnerup qajannaatsup amigaataanera pissutigalugu taakku salliunneqassapput.
AAMMA ATUARUK Nunavut matoqqagaluatoq coronamik tunillatsittut amerlisut
Covid-19-imik tunillatsissimasut amerlassusaat sapaatini-akunnerni marlunni kingullerni amerliartuinnarput, aamma nunaqarfinni Arviani.
Canadami naggueqatigiit inuit unammillernartorsiorput, nunaqarfinnimi peqqinnissamut oqartusanit innersuussutit malinniarneqarnerat ajornakusoortorujussuuvoq. Tassa imaappoq: Imminut qanillinaveersaarneq aamma assat asakulanissaat ajornakusoorluni.
Nunaqarfinni amerlasuuni inissiat pisoqaanerat inuppassuaqarnerallu pissutigalugit tamanna periarfissaanngilaq. Arlaallu napparsimangaatsialissagaluarpat nakorsat amigaataassallutik.
Naalli naggueqatigiit inuit First Nationsillu maanna salliutinneqartussanngoraluartut suli ajornartorsiuteqarpoq.
AAMMA ATUARUK Canadap inatsisartuisa Inuit pisinnaatitaaffii suliariniaraat
Akiuussutissat siulliit nakorsaasiorfissuarmit, Pfizerimit naneqarsimasut atornissaat ajornakusoortorujussuusut, Nunavummi peqqinnissamut pisortaq, Michael Patterson CBC Newsimut oqarpoq.
Taakkumi qerititsivinni 60-80-illu akornanni nillissuseqarsinnaasumi uningatinneqassapput. Qerititsiviillu taamaattut nunaqarfinni nassaassaanngillat.
Taamaammat akiuussutissamik suliffeqarfimmit Modernameersumit utaqqiinnassagunartut Pattersonip oqaatigaa. Akiussutissarmi taanna assartorneqarsinnaallunilu nunaqarfinni uninngatitsiviusinnaasuniissinnaavoq.
