Nunatta Webby Award pissarsiariinnaqaa

Greenland.com-ip ippassaq unnukkut takornariartitsisut nittartagaanni nersornaat tiguaa internetimik atuisut taasineranni People's Voice Award-imik taaneqartartumi taanna taaguunneqarnerpaammat. Nersornaat tunniunneqarpoq tusagassiortorpassuit inuppassuillu ussangartoralugit nuannaanerlu angeqaaq qallunaaq isiginnaartitsisartoq Nikolaj Coster-Waldau aamma Visit Greenlandimi sulisoq Ella Grødem akissarsiassaq tigussallugu scene-mut qaqimmata.

Allattoq Noah Mølgaard

maajip 22-at 2012 08:31

Kalaallisut oqaatsit pingasut atorlugit Nikolaj Coster-Waldau nersornaatip Ella Grødem peqatigalugu tigunerani oqaaseqarpoq. Oqaaserisai tassaapput: "Asanninneq pillugu iliuutsikka" takornariartitsinermi nittartakkat pitsaanersaattut nersornaat ippassaq New York-imi tunniunneqarmat.

- Assorujussuaq tulluusimaarnarpoq maani Nunarput sinnerlugu nittartakkatta saqqummilaartinnera, Nikolaj Coster-Waldau-illu peqataaneratigut tusagassiorfinnit assut alaatsinaanneqarpugut taannami ilaasimanngikkaluarpat akissarsisorpassuit akornanni malugineqarpiarsimassanngikkaluarpugut, Ella Grødem Visit Greenlandimiit oqarpoq.

Isiginnaariarpassuillu nunarujussuaq malugaat USA-mi inuinit Guutip nunaatut taaneqartartumi.

- Maani inuit nersornaatip tunniunnera sioqqullugu kingornalu assut inussiarnisaarput Kalaallit Nunaallu annerusumik tusagaqarfigerusululgu. Oqaloqatigisattalu tamarmik tupigusuutigaat nuna taama inukitsigisoq nunat tamalaat unammineranni taama angusarissaartigimmat, Ella Grødem naammagisimaarinnilluni oqarpoq.

Nunatta Webby Award pissarsiariinnaqaa

Aamma atuaruk