Nunatta taaguutaata allanngortinnissaa Naalakkersuisut pilersaarutiginngilaat
Taama nalunaaruteqarpoq ilinniartitaanermut, kultureqarnermut, ilisimatusarnermut ilageeqarnermullu naalakkersuisoq Nivi Olsen, § 37 naapertorlugu Nikolaj Jeremiassenip Siumumeersup apeqquteqaataanut akissuteqarnermini.
Nikolaj Jeremiassen isumaqarpoq, Kalaallit Nunaata Inuit Nunaannik taaguuteqarnera utertinneqartariaqartoq, siulitta maani najugaqartut taama taaguuteqartimmassuk
Innuttaasut taasitinneqarnissaat imaluunniit innuttaasut isumasiorneqarnissaat periarfissatut taaneqarpoq, taamaalillutik innuttaasut isumaat tusarneqassammat.
Aamma atuaruk Inatsisartunut ilaasortap Inuit Nunaat nunatsinnut taaguutinngortikkusukkaa
Nivi Olsen akissuteqarluni allappoq nunatta atiata allanngortissinnaaneranut tunngatillugu inatsisitigut akornutissaqassanngitsoq.
- Piffissami matumani Naalakkersuisut pilersaaruteqanngillat innuttaasut isumasiussallugit, innuttaasut kissaatigissaneraat Kalaallit Nunaat Inuit Nunaannik taarserneqassanersoq, Nivi Olsen Nikolaj Jeremiassenip apeqquteqaataanut akissuteqarluni taama allappoq.
Naalakkersuisut nunatta Inuit Nunaannik taajuuteqalersinneqarsinnaanera pillugu issittumi naggueqatitsinnik isumasioqateqarnissaminnik ukiuni tulleriinni qaninnerni pisinnaasumik Naalakkersuisut pilersaaruteqarnersut Nikolaj Jeremiassenip apeqqutaanut Nivi Olsen akissuteqarnermi, tamatuminnga Naalakkersuisut pilersaaruteqanngitsut oqarpoq.
Naggueqativut aamma imminnut inunnik taagorput. Inuiaallu kalaallit taaguummik piginnittutut tigusissagaluarpata Kalaallit Nunaallu allanngortillugu Inuit Nunaannut, tamanna inunnut allanut tunngatillugu immikkoortitsinertut isigineqarsinnaavoq, Nivi Olsen Nikolaj Jeremiassenip § 37 naapertorlugu apeqquteqataanut akissuteqarluni taama allappoq.