Nunatta Savalimmiullu erfalasui Jyllandip avannaata bussiini erfattussanngorput
Jyllandimmi avannaani angalatitseqatigiiffiup - NT'p siulersuisui aalajangersimapput Kalaallit Nunaat Savalimmiullu pisortatigoortumik nutaanik erfalasumaarutigisalerniarlugit.
Tamanna isumaqarpoq Nunatsinni juunip 21-ianni inuiattut ullorsioraangatta Erfalasorput amusassagaat, savalimmiormiullu erfalasuat Merkid juulip 29-anni inuiattut ullorsioraangata amusassallugu.
Ålborgip borgmesteriata socialdemokraatiusup Thomas Kastrup-Larsenip, NT-imi siulittaasuusup erseqqissarpaa Jyllandip avannaamiut Atlantikullu avannaamiusa akornanni attaveqatigiilluarneq:
- Jyllandip avannaa Kalaallit Nunaannut Savalimmiunullu attaveqartuaannarsimavoq. Grønlandshavnen Kalaallit Nunaannillu niuveqateqarneq Aalborgimi suliffippassuarnik pingaaruteqartunik pilersitsivoq.
Aamma atuaruk Naalagaaffeqatigiinnermi erfalasuliiffissanik pisortatigoortunik akuerineqarpoq
-Tamatuma saniatigut ikaartaatit Savalimmiuniittup Torshavnip Hirtshalsillu akornanni toqqaannartumik ingerlaartarput. Taamaattumik bussit maani ingerlaartut Kalaallit Nunaata Savalimmiullu inuiattut ullorsiornerini nalliuttorsioqataasassapput.
Thomas Kastrup-Larsen oqarpoq.
Kalaallit Nunaat Savalimmiullu pisortatigoortumik erfalasulisaaruttarnissaannik naalakkersuisut aalajangereertullu angalatitseqatigiit aamma taamaaliortalerniarlutik nalunaarput.
Kalaallit Nunaatali erfalasua bussini aasamut takussaassanersoq nalorninarpoq, tassami erfalasut piumaneqangaarmata Inuiattut ullorsiornitsinni 2016-imut sanasui angummassinnaassanersut ajornakusuussasoq, Nordjyllands Trafikselskab naliliivoq.