Nunatta Qitornaata kommuunit 17-inngorteqqikkusuppaat
- Kommunit kattussuullugit kommunerujussuanngortinneqarneri iluatsinngitsoorput. Ilami ajutuuvipput, taama toqqaannartigisumik qanittukkut inatsisartunut qinersisoqanngilaattaani Partiinngorlaami Nunatta Qitornaani siulittaasuusoq oqarpoq.
Partiilli suliniutiginiagaat allat suunersut iluamik erseqqarissisinneqanngillat, partiinngorlaarmi naqqaniit piorsarneqaleruttormat. Sapaatilli akunnerani uani AG-mi saqqummersumi apersorneqarmat Vittus Qujaukitsup politikkikkut eqqarsaatersuutini arlallit nittarsaappai.
- Massakkorpiaq inoqarfiit minnerusut ersinngitsumik inuerussarneqaleruttorput, tamannalu uagut peqataaffigerusunngilarput, Vittus Qujaukitsoq oqarpoq.
AAMMA ATUARUK IA aamma Siumut naligiipajaartut
Ajornartorsiullu taannarpiaq aningorniaraanni kommunit 17-inut aveqqinneqarnissaat aqqutissaasinnaasoq Siumukkormiuusimasup isumaqarfigaa, innuttaasunillu qanimut kiffartuussisinnaaleqqinnissaq ukkanneqartariaqarsoralugu.
Pissutsillumi taamaasisinnaappata nunatta namminiilivinnissaanut aqqutissiueqataasinnaasoq Vittus Qujaukitsup isumaqarfigaa qaqugorpiarli namminersulivissanersugut ullulerusunngikkallarlugu. Namminersulivinnissarli Nunatta Qitornaasa namminneerlutik aaliangissasuuppassuk ukiorpassuunngitsut qaangiunnerini pereersimassaaq.
KNR-ip Sermitsiaq.AG-llu qinersisartunik isumasiutitsimmata, ullumikkut qinersisuugutta Nunatta Qitornai ataatsimik isertitaqassagaluarneri pingasunngornermi paasinarsinera Vittus Qujaukitsup nuannaarutigissajunnarsivaa.
AAMMA ATUARUK Qujaukitsoq piukkuppaat
Kommunit aaqqissuussaaqqinnerat januarip allaqqaatani 2009-mi atuutilermat nunatsinni kommunit 18-iusut sisamaannanngortinneqarput.
Ukiorli 2018-ini aallarnerlugu Qaasuitsup Kommunia marlunnut avinneqarpoq, taamaalillutillu kommunit massakkut tallimaalerlutik.
