Nunatta kujataani nannuttassiissutit amerlineqartut

Nunatta kujataani nannuttassiissutit amerlineqarput.

Naalakkersuisut tusagassiuutinut nalunaarummi allapput.

Nannuttassiissutit 2025-mut arfinilinnik amerlipput, nunatta kujataani nannuttassiissutit sisamanit qulinut amerlineqarput, tassa Tunumi Kujataanilu pisassiissutit katillugit 64-init 70-inut qassanneqarlutik. Tamanna nunatta kujataani nannut illoqarfinnut, nunaqarfinnut savaateqarfinnullu qanillattortartut amerliartornerannik pissuteqarpoq.

Amerliartornerat nalinginnaasumit sikorsuaqarneruneranik pissuteqarpoq, nannullu takuneqartut amerlinerat pissutigalugu sumiiffimmi qinikkat aamma aalisartut piniartullu peqatigiiffiata pisassiissutit amerlineqarnissaannik qaammaterpassuarni suaaruteqartarnerannik kinguneqarpoq.

Pisassiissutit marsimi tamakkerneqartut

Nunatta kujataani pisassiissutit ukioq manna sisamaannaasut marsip qaammataani tamakkerneqarput, tamannalu pissutigalugu Kommune Kujallermi borgmesteri, Stine Egede (IA) naalakkersuisunut pisassiissutit amerliniarlugit saaffiginnippoq:

- Nannut amerlisimanertik pissutigalugu kaallutik inoqarfinnut qunujunnaarlutik appakaattalernikuupput. Tamatuma saniatigut maani kommunitsinni savaateqarfinnut apuuttartut amerliartuinnarput. Tamannalu ukioq manna marlussoriarluni inunnut ajorluinnartumik kinguneqangajassimavoq nalaatsornerinnakkut pinngitsoortinneqarsimasimasumik, borgmesteri juulimi allappoq.

Naalakkersuisut nannut tunumi nunattalu kujataani-kangisissuani 2014-imit siornamut annertuumik misissorneqarnerat utaqqigaat aalisarnermut piniarnermullu naalakkersuisoq, Kim Kielsen (S) taamani akissutqarpoq.

- Nalunaarusiat saqqummertussat takoqqaarsimatinnagit nalilersimatinnagillu nannuttassat sisamaniit qulinut amerlineqarnissaat Naalakkersuisut oqariartuutigisinnaanngilaat. Kim Kielsen akissuteqaammi allappoq.

Misissuinerlu taanna nunatta kujaani maanna pisassiissuteqartoqarneruneranik kinguneqarpoq. Naalakkersuisut ”nannuttassiissutit agguataarneqarnerat nunatta kitaani ilisimatuussutsikkut inassuteqaatit, tusarniaanerit naalakkersuinikkullu aalajangiinerit” aallaavigalugit aalajangerneqartut tusagassiuutinut nalunaarummi paasissutissiissutigaat.