Aningaasaqarnermut Naalakkersuisoq Andreas Uldum Assi: Jonas Fievé/KNR

Nunatta karsiata amigartooruteqannginnissaanut siunnersuutit isumaqatigineqanngillat

Akitsuutit qaffanneqarpata nunatta karsia 100 million koruuninik qulakkerneqassaaq. Ikumatissanut neqinut sukkunullu akitsuutit qaffanneqarpata nunatta karsia taakkunannga matussuserneqarsinnaanerannik Naalakkersuisut siunnersuuteqarput.

Akitsuutit qaffanneqarnissaannut Nalakkersuisut siunnersuutaat isumaqatigineqanngillat, politikerit arlaqartut assuarinnipput akitsuutillu qaffannagit namminneq allanik siunnersuuteqarlutik.

Siunnersuutigineqartut amerlanerat iluarisimaarutigineqarput, taakkuali Aningaasaqarnermut Naalakkersuisup Andreas Uldumip isumaqatiginngilai:

- Siunnersuutigineqartut piviusorsiortuunngillat, taamaakkaluartoq isumaqatigiinniarnissamut qilanaarpunga, Andreas Uldum oqarpoq.

Aamma atuaruk Akitsuutinut qaffaanissamik siunnersuut isornarineqaqaaq

 

Nukissiorfiit

Taakkununnga ilaavoq Jess Svane Siumut, Nukissiorfiit nunatta karsianit taarsigassarsisarunnaarnissaanik siunnersuuteqarpoq.

Nukissiorfiit nunatta karsianit ukiormanna 200 million koruuninik taarsigassarsivoq. Nukissiorfiit taarsigassarsiniarpat Namminersorlutik Oqartussanit taarsigassasisariaqartoq, Andreas Uldumi oqarpoq.

- Nukissiorfiit Namminersorlutik Oqartussanit taarsigassarsippat taakkua erniaat Namminersorlutik Oqartussat iluanaarutigisarpaat, tassalu illuantungeriinnut iluaqutaavoq, Andreas Uldum oqarpoq.

Aamma atuaruk Akitsuutit qaffanneqartariaqanngillat

 

Siunnersortit Aatsitassat

Nunatta avataaniittunik siunnersortinik atuisarnerit sipaarutigineqarsinnaaasut Siumumi politikeri alla, Suka K. Frederiksen siunnersuuteqarpoq. Taakkua saniatigut aatsitassanut sullissivimmi sulianik sukkanerusumik suliarineqarsinnaanerat taamaaliornikkullu aatsitassanik piiaanerit aningaasarsiorfiusut sukkanerusumik pissarsiarineqarlutik.

Siunnersortit nunatta avataannittut sipaarutigineqarsinnaanerat misissorsimallugit, Andreas Uldum oqarpoq.

Taassuma qularutiginagu oqaatigaa, aatsitassanut qullersaqarfik aatsitasassarsiorniartut qinnuteqaataasa sukkanerusumik suliarineqartarnissaannut Aatsitassanut Naalakersuisoqarfik iliuuseqartoq, Aningaasaqarnermut Aatsitassanullu Naalakkersuisoq oqarpoq, ilanngullugulu oqaatigaa, siunersortit nunatta avataani atorneqartartut ikilisinneqarpata aatsitassarsiorniarlutik qinnuteqartut qinnuteqaataasa suliarineqartarnerat sivisunerulissasoq, Demokraatit siulitaasuat oqarpoq.

- Siunnersortit nunatta avataanit atortakkagut ilaatigut aatsitassannut qullersaqarfimmi atorneqartarput tassalu siunnersortit arlannaalluuniit sipaarutigineqassappata sulianik kiffartuussinerit sivisunerissapput, Andreas Uldum oqarpoq.

 

Sipaaruteqarneq angusaqarluarnerlu

Andreas Uldumip partiianit isumaqartoqarpoq 100 million koruuninit sipaaruteqartoqarnikkut angusaqarnerulernikkullu pissarsiarineqarsinnnasut.

Andreas Uldumip parteeqataannit siunersuut aningaasqarnermut naalakkersuisumit isumaqatigineqanngilaq.

- 100 million koruuninit suminngaanit pissarsiarisinnaanerigut takusinaanngilara inuttaasut kiffartuunneqarnerat ajornerulersinngikkaluarlugu, Aningaasaqarnermut Naalakkersuisoq oqarpoq.

 

Royal Greenland

Ineqi Kielsenip, Siumut, siunnersuutigaa suliffeqarfissuup Royal Greenlandip qullersaqarfia Kalaallit Nunaanut nuunneqassasoq.

Akileraarutit isertinneqartut amerlanerulissagaluartut taanna isumaqarpoq. Andreas Uldum isumaqarpoq siunnersuut atorsinnaanngitsoq:

- Royal Greenlandip isertittagai ikilisinneqarpata tunissassiorfigisassaminilu tunisassiunngippat tamanna nunamut tamarmut sunniuteqartussaavoq taamaattumik tamanna piviusorsiortuunngitsoq isumaqarpunga, Andreas Uldum oqarpoq.

 

Tupat imigassallu

Kullorsuarmi nunaqarfimmi aqutsisunut ilaasortap, Themothæus Petersenip ikummatissanut akitsuutip qaffanneqarnissaannut siunnersuut uggornartoqartippaa. Taanna isumaqarpoq imigassanut akitsuut qaffanneqartariaqartoq.

Imigassanut akitsuutinit siorna isertitsissutigineqartut Andreas Uldumip  innersuussutigai.

Imigassanit cigaritsinilli akitsuutinit siorna isertitsissutigineqartut ikililaarsimapput, Andreas Uldum oqarpoq.

Aamma atuaruk Anda sakkortuunik aalajangiisarniarpoq

Isummersuutit


 

Pages