Nunatta issittumut periusissiamut ilanngussassaa: Atasinnaasumik ineriartorneq

Naalagaaffeqatigiit issittumut periusissiaat 2011-imiit 2020-imut atuuttoq ukioq nikippat atorunnaassaaq.

Periusissiamik nutaamik ukiuni qulikkuutaani tullerni atuuttussamik maanna piareersaasoqarpoq. Periusissiami nunatta, Savalimmiut Danmarkillu issittup ineriartornissaanut pilersaarutaat pingaarnerpaassapput.

Kalaallit danskillu nunatta periusissiassami akuutinneqarnerulernissaa piareersaatitut suliaraat.

Nunanut allanut tunngasunut naalakkersuisuusimasoq, Ane Lone Bagger, februaarip qaammataani KNR-imut ima oqarpoq:

- Naalakkersuisuninngaanniit kalaallit issittumut periusissiami ersarinnerunissaat piumasariniarparput.

AAMMA ATUARUK Bagger: Nunarput Issittoq pillugu Periusissami ersarinnerussaaq

Danskit nunanut allanut ministeriat, Jeppe Kofod, Kalaallit Nunaanut pisortatigoortumik aappassaannik aggustimi tikeraarmat, Kalaallit Nunaat Danmarkilu naligiimmik suleqatigiissasut, nunanut allanut tunngasunut naalakkersuisoq, Steen Lynge oqarpoq.

- Oqallilluarnissarput peqataatitsinissarpullu uannut pingaaruteqarnerpaavoq, naalagaaffeqatigiinnummi tamanut periusissiaammat, Jeppe Kofod oqarpoq.

Nunanut allanut tunngasunut naalakkersuisup, Steen Lyngep, nunarput tusaaneqarsimanerarpaa.

- Peqataatinneqarpugut, kissaatigullu imarisaanut ilanngunneqassapput. Maanna sulinerput illuatungeriit imarisamut isumaqatigiinnissatta tungaanut ingerlatissavarput, Steen Lynge oqarpoq.

Saqitsaaffiunngitsoq

Naalakkersuisut 2021-imiit 2030-imut periusissiassami suut ilanngukkusuppaat?

Naalakkersuisut siullertut politikkiat issittup saqitsaaffiunnginnissaanut tunngasuusoq, Steen Lynge oqarpoq. Tassani sakkulersorfiunnginnissaa aporaattoqannginnissaalu pineqarput.

Nunat pissaanilissuit USA, Rusland Kinalu issittumi sakkutooqarnikkut sakkussiornerat ilisimaneqarpoq.

Aamma USAp nunanut allanut ministeriata Mike Pompeop, ministerit issittumi siunnersuisoqatigiit siorna ataatsimiinneranni Rusland Kinalu appisaluuppai.

AAMMA ATUARUK Ruslandip Kinallu Issittumi inissisimanerat Pompeop isornartorsioraa

Naak issittup saqitsaaffiunnginnissaa naalagaaffeqatigiit pissaanilissuartulli kissaatigingaluaraat aningaasat sakkutooqarnermut atugassat amerlanerusariaqarput. Taakkua sakkunut atorneqaratik nunatta nakkutigineqarneranut atorneqassapput.

Saqitsaattoqannginnissaata saniatigut atasinnaasumik ingerlaneq periusissiassami Naalakkersuisunut pingaartuuvoq.

- Aningaasaqarnitta atasinnaasumik ineriartornissaanut periarfissaqassaagut aamma pisuussutit atasinnaasumik atorneqassapput, Steen Lynge oqarpoq.

Naalakkersuisut aamma issittumi siunnersuisoqatigiinni ullumikkornit pingaaruteqarnerusumik inissisimarusupput, tamannali periusissiami piumasarinianngilaat.

Periusissamilli sulineq coronamit aamma eqqorneqarpoq.

Qinikkat nunatsinneersut, Savalimmiuneersut danskillu Ilulissani marsip qaammataani ataatsimiittussaagaluarput aamma inuttaasunik ataatsimiititsineq maajimi pisussaagaluarpoq taakkuali tamarmik unitsiinnarneqarput, taamaalilluni periusissiap ukiup nikinnerani naammassinissaa ilimanarunnaarpoq.

- Ukiup affaata iluani piareernissaa neriuutigaarput, aappaaguli ukiup affaani siullermi piareernissaa piviusorsiorneruvoq, Steen Lynge oqarpoq.