Nunatta EU-mit aninini peqqissimissutiginngisaannarpaa
"EF-imit Anisa"-mi taamani siuttuusimasut ilaat, Inatsisartut siulittaasuat Lars-Emil Johansen, taama isumaqarpoq.
- Oqariartaasiinnartut immaqa nipeqarsinnaavoq, kisianni taama pinerput peqqissimissutiginngisaannarpara. Sutigut tamatigut pitsaanerusunik atugaqalerpugut, Lars-Emil Johansen nutaarsiassaqartitsivimmut Ritzauimut taama oqarpoq.
Nunatta EF-imit anineranut aalisagaatit imartallu nammineq oqartussaaffigilernissaat pingaarnertut siunertarineqarpoq.
- Aningaasaqarnerput pitsaanerulerpoq kiffaanngissuseqarnerulerlutalu, aamma aalisakkanut oqartussaaffik utertipparput, taamaalillutalu sineriatta avataani aalisassagutta EU apereqqaartussaajunnaarlutigu, Lars-Emil Johansen oqarpoq.
Tusagassiuutit, isummersortartut politikerillu Tuluit Nunaanni innuttaasunik taasititsisoqarnissaanut atatillugu ersisaarutaat Lars-Emil Johansenip ilisarisinnaavai.
- Ingerlatsivik, klubbi, peqatigiinneq aappariinnerluunniit peqataaffigissallugu iluarinngikkaanni, taava isumaqarpunga qimanneqartariaqartoq, Lars-Emil Johansen oqarpoq.
Danskit nunanut allanut tunngasunut ministeriata Kristian Jensenip oqaatigaa ilaatigut Danmarkimit tapersersorneqarneq iluaqutigalugu "Kalaallit Nunaat ullumikkut ingerlalluartoq".
- Kalaallit Nunaata EU-llu avissaartinnissaat taamani ajornannginneerarsuuvoq, Tuluit Nunaata EU-llu ullumi avissaartinnissaannut sanilliutissagaanni, Kristian Jensen oqarpoq.
Kalaallit Nunaat 56.000-inik innuttaqartoq ataasiinnavimmik soqutigisarpoq - tassalu aalisarneq - Tuluilli Nunaat 64 millioninik innuttaqarpoq aningaasaqarneralu nunarsuarmi anginerit tallimaralugu. Aamma Tuluit Nunaat maanna ukiuni 43-nngulersuni EU-mut alliartuinnarsimasumut ilaavoq.
- Tuluit Nunaat Kalaallit Nunaata taamani EU-mit aninissaminik isumaqatigiinniarneranut sanilliukkaanni, ullumikkut qanittuararsuarmik EU-mut akuuvoq. Taamaakkaluartorli taamani aniniarnera aamma sivisuupilussuuvoq, Kristian Jensen oqarpoq.
"Kalaallit Nunaata EU-llu peqatigiinnissamik isumaqatigiissutaannut" atatillugu, Kalaallit Nunaat EU-p missingersuutaanit tapiissutisisarpoq. Kalaallit Nunaat 2007-imit 2013-imut agguaqatigiissillugu ukiumut 25 millionit euronik, tassalu 185 millionit koruunit sinnerlugit, pissarsisarpoq.
EU-Kommissioni 2014-imi oktobarip qaammataani aalajangerpoq Kalaallit Nunaanni ilinniartitaanermut ukiuni 2014-imit 2020-mut 1,6 milliardit koruuninik tapiissuteqarneruniarluni.
/Ritzau/