Nunatta ernganik nioqquteqarusuttut amerlasut
Naalakkersuisut kitaani sumiiffinnut tallimanut sermeq imerlu pillugit ukioq manna aggustip aallaqqaataata tungaanut neqeroortitsipput.
Neqeroortitsinerlu iluatsippoq.
Tassami ingerlatseqatigiiffinnit arfineq-marlunnit qinnuteqaatit 16-it tiguneqarsimasut, Inuussutissarsiornermut, Nukissiuuteqarnermut Ilisimatusarnermullu Naalakkersuisoq Jess Svane allappoq.
AAMMA ATUARUK Naalakkersuisoq vil sælge vand i Kina
- Suliffeqarfiit nunatsinni sermimik imermillu iluaquteqarniaraangamik periuseq siusinnerusukkut tassaasimavoq namminneerlutik sumiiffinnik piukkunnartunik ujartueqqaartarnerat, naalakkersuisoq allappoq.
Naalakkersuisulli ujarassiornikkut misissuisarfik, GEUS, suleqatigalugu sumiiffiit imeqarfiusut tikikkuminartumiittut sumiissusersivaat. Sumiiffiit tallimat neqeroorutigineqarput, ingerlatsiviillu assut pileritsassimaqisut, naalakkersuisoq allappoq.
- Kalaallit Nunaat sammisami matumani maligassiuisuuvoq. Nalunanngilluinnarpoq uagut pullavipput, tassa suut tamaasa killormoorlugillusooq, sioqqullugu sumiiffiit misissorneqarlutillu nalunaarsorneqarsimasut iluaqutaasimasoq, Jess Svane allappoq.
Nunanut allanut nioqqutissatut nunap karsianut isaatitsissutitut nutaatut imeq naatsorsuutiginiarlugu Naalakkersuisut ukiut marlungajaat matuma siorna nalunaarput.
Inuussutissarsiornermut, Nukissiuuteqarnermut Ilisimatusarnermullu Naalakkersuisoqarfik oqartussaasullu suliamut attuumassuteqartut qinnuteqaatit, Naalakkersuisunut saqqummiunneqarnissaat siunertaralugu, misissulerpaat.
